“Тутэйшых” можна будзе легальна пабачыць у Беларусі

Кінаспектакль паводле знакамітай пьесы Янкі Купалы “Тутэйшыя”, які зняты тэлеканалам “БелСат”, хуткім часам можна будзе легальна пабачыць у Беларусі. Як паведаміў Рацыі старшыня культурніцкай камісіі Партыі БНФ Франак Вячорка, зараз ён займаецца рэгістрацыяй “Тутэйшых” у дзяржрэгістры кінастужак:

- Тэлеканал “БелСат” – арганізацыя сур’ёзная. Яны патрабуюць поўнай легальнасці і супрацоўнічаюць з афіцыйнымі структурамі. Таму нам прыйшлося звярнуцца па рэгістрацыю “Тутэйшых”. І не пачулі ад чыноўнікаў ніякіх пярэчанняў. Зараз усе дакументы знаходзяцца ў працэсе зацвярджэння. І неўзабаве кінаспектакль “Тутэйшыя”, зняты тэлеканалам “БелСат”, будзе паказаны ў кінатэатрах “Перамога”, магчыма, “Цэнтр-відэа”, а таксама па Беларусі.

Франак Вячорка паведаміў таксама, што Партыя БНФ распачынае кампанію ў падтрымку “БелСату”. З гэтай мэтаю кожнаму з актывістаў партыі, будзе прапанавана падчас выбарчай кампаніі бесплатна распаўсюджваць фільмы, знятыя тэлеканалам.

Акрамя таго, суместна з адміністрацыяй “БелСату” плануецца арганізаваць шэраг  паказаў фільмаў “Дзень Незалежнасці”, “Слуцкі ўзброены чын” і “Тутэйшыя” у рэгіёнах.

Адначасова сябры Партыі БНФ будуць распаўсюджваць налепкі і ўлёткі, распавядаючыя пра дзейнасць тэлеканала “БелСат”, а таксама незалежных радыёстанцый “Радыё Рацыя” і “Еўрапейскае радыё для Беларусі”:

 - Мы павінны распавесці людзям пра незалежныя крыніцы інфармацыі. Большасць людзей варыцца ў катле афіцыйнага тэлебачання – БТ, АНТ ды іншых прапагандысцкіх тэлеканалаў. А нашая задача расплюшчыць ім вочы, раскраць вакно ў свет незалежнай інфармацыі.

 Кастусь Вансяцкі, Радыё Рацыя, Мінск