Гэта рубрыка ў RSS11 ліпеня ў Раўбічах пад Мінскам ўжо ў чацверты раз адбудзецца фэстываль “Амбасовішча”. Штогод на сцэну, што месціцца на тэрыторыі рэзідэнцыі амбасадара ЗША выходзяць зоркі беларускай музыкі і маладыя гурты.
На гэтае свята беларускай музыкі і свабоды збіраюцца ля трох сотняў чалавек, сярод якіх прафесіяналы беларускай музычнай індустрыі, журналісты, прадстаўнікі грамадскай супольнасці і дыпламаты.
Падрабязнасці пра сёлетняе “Амбасовішча” Рацыі паведаміла аташэ па пытаннях інфармацыі, адукацыі і культуры Амбасады ЗША Кэралайн Сэвідж :
-Гаспадаром сёлетняга фестывалю выступіць часовы павераны Джонатан Мур. “Амбасовішча-2008” будзе складацца з дзвюх частак. У першай выступяць маладыя гурты, што прадставяць кожны з рэгіёнаў Беларусі. Пераможцаў гэтага конкурсу вызначаць госці фестывалю. А ў другой зайграюць добравядомыя беларускія гурты. Мы ўпершыню запрасілі на гэтай мерапрыемства і музыкаў з ЗША – гэта будзе “Трыо Фокс”.
На “Амбасовішчы” выступяць больш за дзесятак гуртоў. З Полацку прыедзе гурт “Індра”, з Магілёву – “Заточка”, зь Бярозы “Кальмары”, Горадню прадставіць “Тлуста луста”, Гомель – гурт “Глінтвэйн”, а хэдлайнерамі фэсту будуць Крама, Крамбамбуля, Гарадзкія, MAUZER і Палац. Жывая трансляцыя “Амбасовішча” на Радыё Рацыя пачнаецца ў пятніцу, 11 ліпеня ў 16 гадзін.
Сяргей Будкін, Радыё Рацыя, Мінск
