Байкатаваць ці не байкатаваць

Ідэя новай стратэгіі апазіцыі, якую агучыў каардынатар грамадскай ініцыятывы “Хартыя-97” Зміцер Бандарэнка, адразу ж выклікала хвалю водгукаў.

Намеснік Зянона Пазняка па партыі КХП-БНФ Юры Беленькі вельмі асцярожна выказаўся з нагоды гэтай заявы, хоць напярэдадні кожнай выбарчай кампаніі ў Беларусі лідэры КХП-БНФ заклікаюць да байкоту.

Спадар Беленькі пацвердзіў, што будучыя парламенцкія выбары яго партыя таксама будзе байкатаваць. Але далучэнне да кампаніі па байкоту выбараў – не ёсць самамэтай, зазначыў намеснік Зянона Пазняка.

- Ёсць пытанне па стварэнню кааліцыі з тымі, хто працаваў на карысць рэжыма Лукашэнкі, заклікаючы “Приди и скажи ему “нет!”. Але цяпер яны змянілі свае погляды. Хацелася б паверыць у шчырасць гэтых людзей, але якраз у гэтым і пытанне.

Лідэр Аб’яднанай грамадзянскай партыі Анатоль Лябедзька згадвае пра свой удзел у кампаніі байкоту ў 2000 годзе і ацэньвае яе, як паспяховую. Але цяпер, праз восем год, ён не гатовы далучыцца да такой кампаніі.

- У 2000 годзе галасы прыпісвалі, а ў 2008 годзе галасы проста не лічаць - і не будуць лічыць. Колькі б людзей не ўдзельнічала, лічбы будуць тыя, якія назавуць у Чырвоным доме.

У сувязі з гэтым старшыня АГП заявіў пра абмежаваны ўдзел у выбарчай кампаніі з тым, каб атрымаць магчымасць данесці сваё пасланне да людзей, а за некалькі дзён да галасавання зняць сваіх кандыдатаў.

- Калі мы сёння скажам, што не прымаем удзел у выбарчай кампаніі, не працуем з людзьмі, то, я думаю, каэфіцыент карыснай дзейнасці будзе значна ніжэйшы.

Палітолаг Уладзімір Роўда прызнаецца, што заява Змітра Бандарэнкі апынулася для яго поўнай нечаканасцю. Стратэгія ўжо распрацавана і няма сэнсу яе змяняць, цвердзіць эксперт.

- Не варта зараз ісці на байкот, трэба выконваць тую стратэгічную лінію, што была прынята на Кангрэсе дэмакратычных сілаў. А яна прадугледжвае ўдзел у кампаніі, але не ўдзел у галасаванні, бо як само галасаванне, так і выбары будуць сфальсіфікаваныя.

На меркаванне эксперта, неразумна адмаўляцца ад магчымых хоць бы мінімальных кантактаў з выбаршчыкамі. Удзельнічаць у выбарчай кампаніі з гэтай нагоды папросту неабходна і зняцца варта калектыўна ўсім дэмакратычным кандыдатам непасрэдна перад выбарамі, так бачыць развіццё далейшых падзеяў Уладзімір Роўда.

Сяргей БУДКІН