Гэта рубрыка ў RSSУ свой 31 дзень народзінаў трагічна загінуў віленскі беларус Валеры Місюк.
Трагедыя адбылася ў Беларусі, ў вёсцы на Мядзельшчыне, адкуль паходзілі ягоныя бацькі. Як патлумачыў старшыня Таварыства беларускай культуры ў Вільні Хведар Нюнька, Валерыя Місюка забіла токам у лазні.
Па здзеклівай іроніі лёсу, Місюк доўгі час працаваў у Вільні інжынерам-электрыкам. Валеры Місюк нарадзіўся 19 ліпеня 1977 г. у ваколіцах Вільні. Некалькі гадоў ён быў намеснікам старшыні ТБК. Місюк рупліва працаваў на ніве Беларушчыны.
Талент Валерыя праявіўся і ў навуцы: на кафедры мэнэджмэнту Віленскай калегіі Місюк чытаў лекцыі па лагістыцы і кіраваньні.
Старшыня ТБК Хведар Нюнька памінае памерлага сябра толькі добрым словам:
- Цяжка слова падабраць, што гэта быў за чалавек. Нарадзіўся ў Вільні і валодаў выдатна беларускай мовай. Меў вялікую перспектыву ў кар’еры. Гэта жах, і гэта нават цяжка ўспрымаць, што яго няма. Для нас гэта страта незаменная.
Пахаванне Валерыя Місюка адкладваюцца ў сувязі з неабходнасцю рэпатрыяцыі цела з Беларусі.
Сяржук Гаўрыленка, Радыё Рацыя, Вільня
