Рытуальны візіт Уга Чавэса ў Мінск

23 ліпеня Прэзідэнт Венесуэлы Уга Чавэс наведае Беларусь. Практычна ўсе інфармацыйныя агенцтвы паведамляюць пра дадзеную сустрэчы, а беларускі ўрад вядзе падрыхтоўку да сустрэчы, забяспечваючы як заўсёды беспрэцэдэнтныя меры перасцярогі, перакрываючы рух на шматлікіх вуліцах Мінску.

Увогуле інфармацыйныя агенствы падкрэсліваюць, што Уга Чавэс наведваў Менск ужо двойчы, апошні раз ўлетку 2007-га. Аляксандр Лукашэнка пабываў з афіцыйным візітам у Каракасе ў снежні 2007 году. Напярэдадні венесуэльскі лідэр афіцыйна наведвае Маскву, дзе таксама мае шэраг перамоваў. Але да інфармацыі пра сустрэчу беларускага прэзідэнта з венесуэльскім планавалася сустрэча Лукашэнкі з Юшчанкам, якая была адменена. Палітычны аналітык Раман Якаўлеўскі адзначае некаторыя моманты сустрэчы Лукашэнкі і Чавэса. Адмена Лукашэнкам сустрэчы з украінскім прэзідэнтам сведчыць пра прыярытэтны накірунак знешняй палітыкі беларускага рэжыму. Паводле Рамана Якаўлеўскага падчас сустрэчы будзе весціся абмеркаванне крэдыту для беларускага боку, гэта будзе асноўнай тэмай перамоваў. Сярод іншых тэм, відавочна, будзе пытанне пастаўкі зброі.

Што тычыцца сустрэчы Уго Чавэса, то паводле афіцыйных крыніц сустракаць былога вайскоўца будзе намеснік міністра прамысловасці Гурыновіч. Але гэта не азначае, што так яно і будзе. Планы ў кіраўніцтва краіны могуць змяніцца ў апошні момант. Іншая справа, трэба меркаваць, Віктар Шэйман не будзе браць удзел у перамовах.

Што тычыцца маскоўскай сустрэчы Чавэса, дык беларуска-расейскі палітолаг Андрэй Суздальцаў адзначае, што вынікі сустрэчы наўрад ці будуць даспадобы Уго Чавэсу. Апетыт венесуэльскага кіраўніка павялічваецца. Паводле Андрэя Суздальцава Чавас просіць у Расеі зенітныя сістэмы “Буг”, шэсць рознага тыпу падводных лодак, а таксама вядзе перамовы пра транспартную і баявую авіяцыю. Акрамя гэтага Венесуэла жадае набыць снайперскія вінтоўкі, і сістэму “Ігла”. Паводле палітолага, ўсё згаданае ўзбраенне не можа быць так проста прададзена, але Чавэс не жадае ісці, паводле расейскага МЗС, на падпісанне даволі жорсткай умовы продажу-куплі. Таму падпісанне канкрэтнага кантракта не чакаецца. Але з улікам запытаў Чавэса можна казаць, што Беларусь не мае такой зброі і канкурэнтам для Расеі яна не з’яўляецца.

Тут варта адзначыць, што Беларусь сапраўды не ў стане канкураваць з Расеяй, таму і сустрэча з беларускім лідэрам для венесуэльскага прэзідэнта не носіць нейкага стратэгічнага характару, пра гэта адзначае і Валер Карбалевіч, беларускі палітолаг. Палітолаг мяркуе, што па вялікаму рахунку медыйная ўвага да сустрэчы Лукашэнкі і Чаваса перабольшаная. Гэтая сустрэча хутчэй рытуальная: Чавэс едзе ў Маскву і было б непрыстойна, недыпламатычна не заехаць да свайго новага сябра Аляксандра Лукашэнкі.

Што тычыцца нейкіх крэдытаў, то венесуэльскі лідэр актыўна дапамагае і Кубе, і іншым краінам Лацінскай Амерыкі. Таму на гэтым фоне Лукашэнка таксама гатовы стаць у чаргу да багатага лацінаамерыканскага “дзядзькі”. Але ці будзе атрыманы крэдыт, ці не – невядома. Чавэс гатовы інвеставаць, але толькі пад канкрэтныя праекты. Да таго ж інфармацыя пра дадзеныя крэдыты даволі супярэчлівая.

У Менску на вуліцы Захарава нядаўна быў закладзены парк імя Сымона Балівара -- аднаго з кіраўнікоў вайны за незалежнасць іспанскіх калоній у Паўднёвай Амерыцы, вялікім прыхільнікам якога з'яўляецца Уго Чавэс. Напярэдадні парк запоўнены машынамі пажарнай службы, дворнікамі, працаўнікамі «зеленбуда» і супрацоўнікамі міліцыі. Не выклікае сумневаў, што «ахоўнай асобай», які прыбудзе заўтра ў парк, будзе венесуэльскі прэзідэнт. Указанні для мінчукоў зачыняць наглуха фортачкі і не падыходзіць да вокнаў сталі будзёнымі. Так і на гэты раз простыя гараджане наўрад ці запомняць сустрэчу кіраўніцтва Беларусі і Венесуэлы паводле гэтай забаронай.

 Сяргей Скулавец, Радыё Рацыя, Беласток.