У Брэсце пройдзе сустрэча з рэжысёрам Валерыем Мазынскім

Заўтра ў памяшканні Брэсцкай суполкі Партыі БНФ адбудзецца творчая сустрэча з вядомым тэатральным рэжысёрам Валерыем Мазынскім.

Валерый Мазынскі быў галоўным рэжысёрам Беларускага драматычнага тэатру імя Якуба Коласа ў Віцебску, многія з пастаўленых ім спектакляў сталі з’явамі ў тэатральным жыцці – “Званы Віцебску” і “Кастусь Каліноўскі” паводле Уладзіміра Караткевіча, “Сымон-музыка” паводле Якуба Коласа, “Вечар” і “Парог” Аляксея Дударава ды іншыя.

Ад 1991 года Мазынскі ў Мінску ставіць спектаклі ў Купалаўскім тэатры і выкладае рэжысуру ў Беларускім тэатральн-мастацкім інстытуце. Ён стварыў тэатр-лабараторыю беларускай драматургіі “Вольная сцэна”, кіраўніком якога быў восем гадоў. “Вольная сцэна” была закрытая ўладамі, як сведчаць тэатразнаўцы, фактычна з прычыны няўгоднасці рэпертуарнай палітыкі і атмасферы беларускасці.

Апошні свой спектакль паводле Максіма Горкага “На дне” Валерый Мазынскі паставіў у камеры турмы на Акрэсціна, дзе адбываў 10-суткавы арышт пасля затрымання на падыходзе на Кастрычніцкай плошчы летась 20 сакавіка.

У тандэме з польскім калегам Дарыюшам Шадай на Беласточчыне зняў тэлефільм “Тутэйшыя” паводле аднайменнай п’есы Янкі Купалы для тэлеканала “БелСат”.