Гэта рубрыка ў RSSНа праспекце Незалежнасці затрыманы лідэр АГП Анатоль Лябедзька, а таксама сябры моладзевага крыла партыі "Маладыя дэмакраты" - Віталь Стажараў, Мікола Сергяенка, Кірыла Паўлоўскі.
Іх затрымалі пасля таго, калі ў раёне ГУМА яны раздалі мінакам газету "Народня Воля", у якім было апублікавана Пасланне, прынятае на 11 з'ездзе Аб'яднанай грамадзянскай партыі.
Разам з імі затрыманы карэспандэнт "Народнай Волі" Віталь Гарбузаў. Усіх даставілі ў РУУС Цэнтральнага раёна.
Сёння ў 11 гадзін сябры АГП планавалі перадаць пасланне да грамадзян, прадстаўнікаў бізнесу і дзяржавы, прынятае на 11-м з'ездзе АГП, прэм'ер-міністру Беларусі Сяргею Сідорскаму і спікеру Палаты прадстаўнікоў Нацыянальнага схода Беларусі Вадзіму Папову.
- Аднак на падыходзе да Дома ўрада каля будынка парламента на плошчы Незалежнасці нас затрымалі супрацоўнікі міліцыі ў форме. Нас фактычна блакаваў АМАП. Пры гэтым супрацоўнікі міліцыі не маглі растлумачыць, чаму вызначаныя людзі маглі праходзіць па плошчы, а вось чалавеку з прозвішчам Лябедзька гэтага не дазволілі. Плошча не была ачэпленая: астатнія грамадзяне вольна па ёй перасоўваліся. Блакавалі толькі нас, - сказаў А.Лябедзька.
Нагадаем, што зараз у Палаце Прадстаўнікоў выступае са сваім Пасланнем да беларускага народа Аляксандр Лукашэнка.
