Гэта рубрыка ў RSSПасля выходных у Гродне пачнуцца праверкі зямельных надзелаў, якія знаходзяцца ў прыватнай уласнасці ці пажыццёвай спадчыне паблізу вадаёмаў.
Паводле рашэння гарвыканкаму, меры па выкананні прыродаахоўнага заканадаўства павінны былі прымацца яшчэ да 1 траўня.
Як паведаміла начальніца гарадской інспекцыі прыродных рэсурсаў і аховы навакольнага асяроддзя Ірына Алёхіна, заканадаўствам забаронена араць зямлю ды выкарыстоўваць ўсе віды ўгнаенняў паблізу вадаёмаў. Забараняецца таксама агароджваць вадаёмы.
- Ёсць такое патрабаванне ў межах горада: забараняецца агароджванне гэтых участкаў да ўрэзу вады. Дзеля чаго гэта робіцца? Дзеля таго, каб магла пад’ехаць машына для прыборкі вадаёма ці вадатока.
У Гродне існуе і праблема побытавых сцёкаў, гаспадарчых адыходаў і прыбіральняў.
- Ва ўсіх ёсць прыбіральні ў двары. У большасці выпадкаў там звычайныя земляныя ямы, а трэба каб былі герметычныя бетонныя кольцы.
Заканадаўствам таксама забараняецца ставіць і мыць аўтатранспарт бліжэй чым 30 метраў ад вадаёмаў. Парушальнікаў чакае штраф ад 10 да 30 базавых адзінак.
Вацлаў ГАЛІМСКІ
