Лідэры краін Еўрасаюза разглядаюць магчымасць увядзення санкцый супраць Расіі. Аб гэтым, як паведамляе агенцтва Рэйтэр, заявіў 28 жніўня міністр замежных спраў Францыі Бернард Кушнер.

У Бруселі 1 верасня пройдзе экстранны саміт кіраўнікоў дзяржаў Еўрасаюза, скліканы па ініцыятыве прэзідэнта Францыі, якая старшынствуе ў ЕС, Нікаля Сарказі. На саміце будзе абмяркоўвацца сітуацыя вакол Грузіі, Абхазіі і Паўднёвай Асеціі, а таксама будучыня адносінаў паміж ЕС і Расіяй.

У адказ на пытанне аб мерах, якія могуць быць прыняты супраць Расіі на саміце, Б.Кушнер сказаў: "Санкцыі абмяркоўваюцца". Пры гэтым ён не стаў паведамляць якія-небудзь падрабязнасці.

Нагадаем, у ноч з 7 на 8 жніўня ў непрызнаную рэспубліку Паўднёвая Асеція, якая тэрытарыяльна з`яўляецца часткай Грузіі, былі ўведзены грузінскія ўрадавыя войскі. Грузія заявіла, што мае намер скончыць з "крымінальным рэжымам" у непрызнанай рэспубліцы і аднавіць парадак.

Паводле звестак уладаў Паўднёвай Асеціі, ахвярамі ўзброенага канфлікту сталі 2.100 чалавек. Расія для абароны жыхароў Паўднёвай Асеціі, многія з якіх з`яўляюцца расійскімі грамадзянамі, увяла ў рэгіён у дапамогу раскватараваным там міратворцам каля 10 тысяч ваеннаслужачых і сотні адзінак ваеннай тэхнікі. 12 жніўня Расія заявіла аб завяршэнні аперацыі па прымушэнні Грузіі да міру, а 22 жніўня аб`явіла, што закончыла адвод войскаў на пазіцыі, вызначаныя рашэннем Змешанай кантрольнай камісіі па ўрэгуляванні грузіна-асецінскага канфлікту ад 1999 года.

26 жніўня прэзідэнт Расіі Дзмітрый Мядзведзеў падпісаў указы аб прызнанні незалежнасці Абхазіі і Паўднёвай Асеціі. Краіны ЕС асудзілі гэтае рашэнне і заявілі аб сваёй прыхільнасці тэрытарыяльнай цэласнасці Грузіі, паведамляе БелаПАН.