У Кобрыне працягваецца ціск на кандыдыта ў дэпутаты ад спісу АДС Аляксандра Меха

У Кобрыне працягваецца ціск на актывіста Партыі БНФ, кандыдыта ў дэпутаты Палаты прадстаўнікоў ад спісу Аб’яднаных дэмакратычных сілаў Аляксандра Меха. Акрамя самога палітыка, пад пільны кантроль уладаў трапілі і сябры яго ініцыятыўнай групы.

Сябар Партыі БНФ, інжынер Аляксандр Мех быў звольнены з працы 30 чэрвеня за тое, што меў намер вылучацца кандыдатам у дэпутаты Палаты прадстаўнікоў ад спісу АДС. Пра гэта палітыку ў адкрытую заявіў начальнік Кобрынскага упраўлення участка магістральных газаправодаў ААТ “Белтрансгаз” у прытунасці раённага куратара КДБ.

Аднак звальненнем праблемы Аляксандра Меха не скончыліся. Пасля таго, як ён перадаў у акруговую камісію спіс сваёй ініцыятыўнай групы, міліцыянеры пачалі ціснуць і на паплечнікаў актывіста. У панядзелак раніцай Аляксандра Меха, разам з сябрам ініцыятыўнай групы Алесем Страчуком, а таксама сябрам акруговай камісіі Яўгенам Лук’янчанкам выклікалі ў адзел крымінальнага вышуку Кобрынскага РУУС на незвычайную размову, якая больш нагадвала апытанне па выбуху ў Мінску:

- Гэта была такая анкета, у якой было пазначана маё прозвішча, імя па бацьку і імя. Таксама былі дадзеныя, якая ў нас машына, ці ёсць у нас знаёмыя ў Мінску, ці ёсць у нас знаёмыя вайскоўцы альбо людзі, якія могуць мець зброю, - распавёў  журналісту Рацыі Аляксандр Мех.

У РУУД Аляксандру Меху і яго паплечнкіам прапанавалі здаць адбіткі пальцаў і ўзор сліны на аналіз ДНК. Адбіткі пальцаў актывіст здаў, а сліну здаць адмовіўся:

- Гэты аналіз можа праводзіць толькі судмедэкперт, а не звычайны міліцыянер. І рабіць такі складаны аналіз можна толькі ў адпаведнай медычнай установе.

Аляксандр Мех лічыць, што патрабаваць аналізу ДНК міліцыянеры могуць толькі ў тым выпадку, калі ў іх ёсць сур’ёзныя падазрэнні на датычнасць чалавека ў здзяйсненні цяжкага злачынства. Актывіст мае намер звярнуцца ў пракуратуру са скаргай на неправамерныя дзеянні ўладаў.

Раней Аляксандр Мех ужо накіроўваў скаргі ў пракуратуру на сваё незаконнае звальненне і перавышэнне паўнамоцтваў начальнікам мясцовага упраўлення “Белтрангазу”, а таксама кіраўніком кобрынскага раённага КДБ. Адказ на свае скаргі Аляксандр Мех пакуль не атрымаў.

Кастусь Вансяцкі, Радыё Рацыя, Мінск.