Сёння ўвечары ля ўваходу ў Лошыцкі парк плануецца правесці акцыю пратэста. Хвалю абурэння выклікала рашэнне мінскіх уладаў правесці перабудову паркавага комплексу ў Лошыцы. Уласна ад парку, што лічыцца помнікам гісторыі, плануецца пакінуць нешмат – ужо валяцца дрэвы на тэрыторыі парку і закапваецца сажалка, у планах таксама рэстаўрацыя сядзібы Прушынскіх.

21 ліпеня выйшаў на волю актывіст Аб’яднанай грамадзянскай партыі, сябра “Маладых дэмакратаў” Кірыл Паўлоўскі. Ён адсядзеў 10 сутак у спецпрыёмніку-размеркавальніку на вуліцы Акрэсціна ў Мінску, быццам бы, за дробнае хуліганства. Віна маладога чалавека палягала ў тым, што ён прышоў 11 ліпеня да будынка КДБ, каб падтрымаць сваіх сяброў, якіх улады падазравалі ў датычасці да выбуха 4 ліпеня ў Мінску.

У Пухавічкім раёне ў рукі дэмакратычнай грамадскасці патрапілі спісы асобаў, згодна якіх мясцовыя міліцыянеры павінны дапытаць па справе аб выбуху 4 ліпеня ў Мінску. Як паведаміў Рацыі кіраўнік Мінскай абласной арганізацыі ПКБ Сяргей Абразоўскі, у спісе 34 прозвішчы людзей ва ўзросце ад 20 да 73 гадоў. Некаторыя з іх ўжо пабывалі ў следчых органах.