У Пухавіцкім раёне апазіцыю выклікаюць на допыты па спісе

У Пухавічкім раёне ў рукі дэмакратычнай грамадскасці патрапілі спісы асобаў, згодна якіх мясцовыя міліцыянеры павінны дапытаць па справе аб выбуху 4 ліпеня ў Мінску. Як паведаміў Рацыі кіраўнік Мінскай абласной арганізацыі ПКБ Сяргей Абразоўскі, у спісе 34 прозвішчы людзей ва ўзросце ад 20 да 73 гадоў. Некаторыя з іх ўжо пабывалі ў следчых органах:

- Ужо пачаліся допыты гэтых 34 чалавек. Больш за тое, іх прымушаюць, пад рознымі падставамі, прайсці дактыласкапічную экпертызу, то бок адбіткі пальцаў  і аналіз ДНК, то бок – здаць слюну. 

Паводле Сяргея Абразоўскага некаторыя актывісты, дазнаўшыся пра існаванне гэтага спісу,  адмовіліся ісці на допыты, і нават запатрабавалі ў супрацоўнікаў міліцыі кнігу скаргаў, каб выразіць свае абражэнне такім падыходам уладаў да дэмакратычнай апазіцыі. Аднак выдаць кнігу міліцыянеры адмовіліся. Тым самым быў парушаны дэкрэт прэзідэнта і закон аб заваротах грамадзянаў. Сам Сяргей Абразоўскі так каментуе дзеянні ўладаў:

- Вяртаюцца назад сталінскія часы 37-х гадоў. І сённяшнія паслядоўнікі тых НКВДыстаў таксама спрабуюць скласці спісы ворагаў народу.

Варта адзначыць, што акрамя сябраў палітычных партый ў чорны спіс увайшлі і грамадзянскія актывісты, якія выступаюць супраць будаўніцтва ў Пухавіцкім раёне пад Мінскам расійскага заводу па вырабу ядахімікатаў “Бел-Август”. Ніякага дачынення да палітыкі гэтыя людзі не маюць. Аднак, як бачым, улады думаюць зусім інакш.

Кастусь Вансяцкі, Радыё Рацыя, Мінск