Гэта рубрыка ў RSSНе паспеў вядомы апазіцыянэр пакінуць сцены віцебскага ІЧУ, дзе трое сутак адбываў пакаранне арыштам, як чарговы раз быў затрыманым на сваім традыцыйным “працоўным месцы” ля гэтак званага “сіняга дому”.
І зноўку прычынай стала правакацыя супраць распаўсюдніка незалежнай прэсы. Папярэдні раз ўчыніў сварку і нават паваліў паджылога чалавека на зямлю нейкі чалавек у цывільным. Але пакаранне атрымаў збіты Хамайда. На гэты раз чалавек у цывільным купіў у распаўсюдніка “Народную волю” і адразу паказаў пасведчанне супрацоўніка міліцыі.
У Чыгуначным РАУС на Барыса Хамайду быў складзены пратакол аб адміністратыўным парушэнні – незаконны распаўсюд прэсы. Цяпер яго, хутчэй за ўсё, чакае чарговы штраф.
Як сказаў Хамайда па тэлефоне з пастарунку, папярэднія і гэтае затрыманні ён лічыць спробамі міліцыянтаў перашкодзіць яму распаўсюджваць незалежныя выданні пад час “Славянскага базару ў Віцебске”. Тым больш, якраз насупраць галоўнай канцэртнай пляцоўкі фэсту.
Вадзімір Жукоўскі, Радыё Рацыя, Віцебск
