Быстрыца адзначыла сваё 625-годдзе
Вёска Быстрыца, што знаходзіцца на рацэ Вілія, лічыцца адной з найстарэйшых у Беларусі. Яе называюць гістарычным сэрцам Астравеччыны, лёс вёскі цесна звязаны з Ягайлам ды Вітаўтам. З 1407 г. Быстрыца належала Вітаўту і была цэнтрам Быстрыцкай воласьці, а ў 1-ай палове XVI стагоддзя паселішча было рэзыдэнцыя Віленскага ваяводы. Быстрыца – адзіны населены пункт Астравеччыны, які быў пазначаны на мапе, выдадзенай ў 1613 г. у Амстэрдаме.
У 1390 годзе кароль Ягайла заснаваў тут касцёл ды кляштар, таму сёлета ў вёсцы адзначылі вялікую дату – 625 гадоў прысутнасці каталіцтва, а заадно і першай пісьмовай узгадкі паселішча.
Урачыстую Святую Імшу адслужыў біскуп Казімір Велікаселец. На запрашэнне ксяндза-пробашча Казіміра Ляховіча на фэст прыехалі іншыя рыма-каталіцкія ды ўніяцкія святары. У часе службы біскуп удзяліў мясцовым парафіянам Сакраманту Канфірмацыі.
Пасля Святой Імшы адбыўся канцэрт з удзелам менскіх хароў “Голас Душы”, “Чырвоныя Макі”. Адмыслова на фэст таксама прыехаў творчы калектыў з БДУ “Тутэйшая шляхта”.
Для жыхароў Быстрыцы застацца каталікамі не было так проста – пасля Паўстання Каліноўскага мясцовы касцёл перарабілі на царкву. Каталікам касцёл вярнулі толькі ў 1926 годзе, а ўжо савецкая ўлада спрабавала забраць храм пад нерэлігійныя патрэбы. Аднак мясцовыя вернікі не аддалі касцёла – усе гады савецкай улады храм дзейнічаў пры адсутнасці святароў.
З супрацьлеглага боку вёскі знаходзіцца крынічка, асвечаная ў 1921 г. ў гонар прыняцця Канстытуцыі 3 Траўня 1791 г. Згодна з мясцовым паданнем, вада з гэтай крынічкі спрычынілася да вяртання зроку аднаму жаўнеру, што праходзіў праз Быстрыцу. У нядаўнім часе побач з крынічкай збудавалі капліцу Святога Яна Хрысціцеля, якога вельмі шануюць мясцовыя парафіяне. Дзень народзінаў святога Яна (24 чэрвеня) святкуюць нароўні з парафіяльным святам – Узвышэннем Святога Крыжа (14 верасня). А ў бочным алтары Быстрыцкага касцёла змешчаны абраз Хросту Езуса ў Ярдане.
[Not a valid template]
Паводле Алены Гануліч, газета “Астравецкая Праўда”
Фота Адама Завальні
