Анатоль Ляўковіч: Не хачу пэцкацца ў выбарчай кампаніі
Экс-старшыня БСДП (Грамада) Анатоль Ляўковіч распавядае, чаму ён адмовіўся хоць нейкім чынам удзельнічаць у гэтай прэзідэнцкай кампаніі.
Анатоль Ляўковіч: Я паслядоўна выступаю, каб у краіне быў рэальны палітычны працэс. Ён у нас, на жаль, адсутнічае. У тым сэнсе, што апаненты ўлады не знаходзяцца ў сістэмным палітычным працэсе і, такім чынам, не могуць удзельнічаць на рэальнай палітычнай ніве. А, калі няма палітычнай канкурэнцыі, то няма і рэальнага палітычнага працэсу. Які сэнс тады наогул прымаць удзел у нейкіх кампаніях? Таму я адразу сказаў: удзельнічаць у гэтым я не збіраюся.
РР: А што вы прапаноўваеце грамадству?
Анатоль Ляўковіч: Мы прапаноўваем сур’ёзныя рэчы – дыялог, каб кансалідаваць беларускую нацыю. Але пэцкаць тое святое, што патрэбна краіне, прымаючы удзел у выбарах, я не буду. Лепш буду паслядоўна прапаноўваць грамадству новую палітыку кансалідацыі. Яна асноўваецца на некалькіх прынцыпах – канструктывізм, кампраміс, кансенсус, канвергенцыя і кансалідацыя.
РР: Можа быць, вам нехта імпануе з патэнцыйных кандыдатаў у прэзідэнты?
Анатоль Ляўковіч: У нас у свой час быў саюз левых партый, туды ўваходзіла ў тым ліку наша партыя і партыя цяперашняга прэтэндэнта Сяргея Калякіна. Праўда, апошні да мяне за дапамогай не звяртаўся. А самому некуды лезці не хочацца.
РР: Некаторыя называюць гэтую прэзідэнцкую кампанію “сумнай”…
Анатоль Ляўковіч: Зато пяць гадоў таму вясёлая была. Зараз многія будуць сумна назіраць за сумнымі выбарамі. Да гэтага самі прыйшлі.
Кастусь Заблоцкі, Беларускае Радыё Рацыя
Фота svaboda.org
