У Кастрычніцкім раёне Гародні не засталося ніводнага беларускага класа
У мэтах „рэарганізацыі” малаколькасныя класы, якія ў сярэдняй школе №34 насілі беларускі статус, уліваюцца ў камплектныя расейскія класы.
Беларускія дзеці будуць вучыцца па асобных беларускіх маршрутах у рамках расейскамоўнай адзінцы класа.
Кажа старшыня абласной рады ТБМ Алесь Крой:
– У 32-ой школе адразу была сітуацыя, што яны ўваходзілі ў рускамоўныя класы, бо там было па 1-2-3 чалавекі – няшмат, і гэтая сітуацыя была апрабаваная. І гэта было зроблена ў Баранавічах – па гэтым прынцыпе была вучоба. Потым у Ленінскім раёне Гародні. Зараз чарга дайшла да Кастрычніцкага. Гэта эканомія сродкаў для бюджэту адукацыі.
Перавага больш індывідуальнага навучаньня беларускамоўных дзяцей цяпер адпадае сама сабой.
Некаторыя такую „інавацыю” адукацыі па-гарадзенску звязваюць з маючым адбыцца візіце расейскіх лідараў у Гародню ў верасні.
Беларускае Радыё Рацыя
