Настальгічныя туры на Палессе
Настальгічныя туры на Палессе – перспектыўны напрамак для развіцця турызму ў рэгіёне. Ураджэнцы рэгіёну хочуць павандраваць па родных старонках, а іх нашчадкі – пабачыць радзіму бацькоў. Краязнаўца Эдвард Злобін, які на прафесіянальным узроўні займаецца настальгічным турызмам, адзначае, што гэты напрамак больш важны за агра- ды экатурызм, якія могуць быць дадаткам у рэгіянальнай турыстычнай інфраструктуры:
– Гэтая тэма ніколі не будзе вычарпаная. Я ўжо з’яўляюся сведкам, калі прыязджаюць унукі і праўнукі, якія нават не ведаюць, што тут такое, яны паказваюць пальцам на мапе – сюды трэба паехаць, бо ў сям’і існуе легенда. Ёсць людзі, якія прыязджаюць, іх продкі выехалі з Пінску яшчэ да рэвалюцыі, з тых часоў, гэта ўжо праўнукі. І людзей не проста цягне, ёсць нейкі абавязак прыехаць у тое месца, дзе былі іх продкі, адкуль родам іх бабулі і дзядулі, адкуль пайшоў іх род.
Паводле краязнаўцы, такія турысты едуць у Пінск ды агулам на Палессе – з Ізраілю і краін Захаду, але не выключэнне і постсавецкія краіны. Такая група наведае горад над Пінай ўжо на наступным тыдні.
Пятро Савіч, Беларускае Радыё Рацыя
Глядзіце таксама
