Выйшаў новы нумар “Arche”
Выйшаў з друку сёлетні пяты нумар часопіса “Arche”. Нумар не з’яўляецца тэматычным, а аб’яднаў найбольш цікавыя матэрыялы, якія апошнім часам трапілі ў рэдакцыю.
Кажа рэдактар часопіса Алесь Пашкевіч:
– Гэтым разам няма такой канкрэтнай тэматыкі, ён складаецца з розных матэрыялаў і дзеліцца на два блокі – на гістарычны і літаратурны. Асноўную частку па аб’ёму складае пераклад рамана Сяргея Пясецкага “Жыццё раззброенага чалавека”. Гэта адзін з яго ранніх раманаў, які апісвае лёс звольненага з польскай арміі пасля польска-савецкай вайны дэмабілізаванага жаўнера. Акрамя таго ёсць шмат гістарычных матэрыялаў.
Сярод іншых матэрыялаў нумару варта вылучыць палемічны тэкст Юлія Каралёва, у якім ён аргументавана дыскутуе з вядомымі даследчыкамі сталінскіх рэпрэсій у Беларусі адносна іх сапраўднага маштабу і колькасці пацярпелых.
У сваю чаргу, гісторык Цімафей Акудовіч падводзіць вынікі мінулагодніх дыскусій адносна студзенскага паўстання на тэрыторыі Беларусі, падымаючы некаторыя спрэчныя пытанні, сур’ёзна не закранутыя беларускімі навукоўцамі і публіцыстамі ў юбілейны год.
Васіль Кроква, Беларускае Радыё Рацыя
