Леў Марголін: Выбараў на самой справе няма
Старшыня Цэнтрвыбаркама Лідзія Ярмошына, выступаючы сёння ў Акадэміі кіравання пры прэзідэнце, заклікала студэнтаў падтрымаць выбары і прыйсці на выбарчыя ўчасткі.
Яна заўважыла, што на выбары траціцца „немаленькая сума”: 181 млрд. рублёў – на першы тур і 260 млрд. рублёў, калі выбары пройдуць у два туры.
Леў Марголін
Частка апазіцыйных палітыкаў лічыць, што выбары трэба байкатаваць, сярод іх намеснік старшыні АГП, эканаміст Леў Марголін:
– Выбараў на самой справе няма, зараз старшыня камісіі проста дастае паперку з кішэні, дзе ўжо загадзя напісаны лічбы, гэтымі лічбамі запаўняе пратакол і дае падпісаць сябрам камісіі. Таму адзіная справа, якая можа нейкім чынам перакрэсліць гэты сцэнар – гэта толькі неўдзел і фіксацыя гэтага. Бо калі ўжо чалавек прыйшоў на выбарчы ўчастак, то камісію ўжо не цікавіць за каго ён прагаласаваў, усё роўна ў выніковым пратаколе будзе сказана, што ён прагаласаваў за Лукашэнку.
Выбары ў Беларусі пройдуць 11 кастрычніка. За пасаду прэзідэнта змагаюцца 4 кандыдаты.
Валянціна Лаеўская, Беларускае Радыё Рацыя
