Берасцейскія кнігазборы: праблемы і перспектывы
Стартавала ІІІ Міжнародная навукова-практычная канферэнцыя “Берасцейскія кнігазборы: праблемы і перспектывы даследавання”. Цягам трох дзён у Берасці, а напрыканцы і ў Пінску навукоўцы Беларусі і замежжа будуць прэзентаваць свае работы па гісторыі, рэлігіі і культуры рэгіёну ў некалькіх тэматычных секцыях. Падрабязней пра падзею кажа краязнаўца Ігар Бараноўскі:
– Тое, што Берасцейская абласная бібліятэка ўжо не першы раз праводзіць канферэнцыю, прысвечаную берасцейскім кнігазборам, гэта выдатна. Традыцыя закладзена, і тое, што адгукаюцца выдатныя навукоўцы не толькі з Беларусі, гаворыць пра тое, што закранаюцца важныя тэмы.
“Навукоўцы раскрыюць архіўныя таямніцы нашай гісторыі і гэта асабліва важна для берасцейцаў. Шмат для каго матэрыялы канферэнцыі стануць адкрыццём, бо Берасце – гэта не толькі крэпасць, а менавіта тое, што напрацаваў горад на працягу сваёй тысячагадовай гісторыі”, – зазначыў Ігар Бараноўскі.
Мікола Ляшкевіч, Беларускае Радыё Рацыя, Берасце
