Музей Магілёва шукае грошы на слуцкі пояс
Музей гісторыі Магілёва абвясціў аб пошуку спонсараў для куплі ў калекцыянера з Мінска слуцкага пояса 1760-90-х гадоў.
Як паведаміў БелаПАН дырэктар музея Аляксей Бацюкоў, калекцыянер Ігар Сурмачэўскі гатовы саступіць каштоўны экспанат за 60 тысяч даляраў, і музей згодны яго набыць, калі знойдуцца спонсары, гатовыя дапамагчы грашыма.
„Пакуль шукаем – звяртаемся, просім падумаць. Пакуль мы не дайшлі да стадыі аб’явы аб зборы сродкаў на спецыяльны рахунак. Калі знойдуцца спонсары, якія скажуць, што гатовыя ўнесці 100-200 млн рублёў, то тады можна падключаць і грамадскасць. Цяпер трэба праверыць у прынцыпе магчымасць сабраць такія грошы”, – сказаў Бацюкоў.
Па словах дырэктара музея, дадзены слуцкі пояс мае найвышэйшую каштоўнасць. Ён цэльны, не перашыты, не перароблены, што само па сабе дастатковая рэдкасць. „Бываюць паясы аднабаковыя, двухбаковыя, чатырохбаковыя. Гэты – чатырохбаковы. Гэта значыць, што яго можна было павярнуць адной з чатырох бакоў і атрымлівалася як бы чатыры розных паясы”, – адзначыў Бацюкоў.
Акрамя таго, пояс мае беларускія арнаментальныя элементы, а гэта значыць, што ён не з’яўляецца раннім слуцкім поясам. „Раннія паясы былі на ўсходні манер, а гэты з’явіўся, калі ўсходняя традыцыя пляцення паясоў ўжо спалучалася з беларускай традыцыяй звыклага арнаменту з элементамі мясцовых кветак. Тут таксама можна ўбачыць нашы валошкі, нашы расліны”, – сцвярджае дырэктар музея.
Паводле яго слоў, у музеях ўсходняй частцы Беларусі слуцкіх паясоў няма наогул. Яны ёсць толькі ў Нясвіжы, Гародні, Слуцку, Слоніме, Менску і Маладзечне.
У цяперашні час слуцкі пояс даўжынёй 3,5 метра і шырынёй 35 см выстаўлены на агляд у магілёўскім музеі. Ён будзе экспанавацца там да канца года, пасля чаго вернецца да калекцыянера. Аднак дырэктар музея спадзяецца, што пояс вернецца ў Магілёў у якасці выкупленага ўласнай экспаната.
