Дабрачынныя канцэрты арганнай музыкі
У Гародні адбыліся тры дабрачынныя канцэрты арганнай музыкі, сродкі ад правядзення якіх накіраваныя на дапамогу дзіцячаму хоспісу, што дзейнічае ў горадзе над Нёманам. Мерапрыемства арганізавала мясцовая евангелістычна-лютэранская суполка ў шчыльнай супрацы з шэрагам заходніх фундацый.
Расейскі арганіст Міхаіл Мішчанка выканаў творы такіх знакамітых кампазітараў, як Іаган Себасцьян Бах, Карл Нільсэн, Роберт Шуман і Руд Лангор. Для музыканта з Санкт-Пецярбургу ўдзел у падобным мерапрыемстве напярэдадні Раства – магчымасць дапамагчы тым, хто гэтага патрабуе:
– Гэта добрая справа. Адзіны момант засмучае – што мала гледачоў. Шкада, што гарадзенцы абышлі ўвагай гэтыя канцэрты.
Уладзімір Татарнікаў, пастар:
– У час канцэрту праводзіцца ярмарка вырабаў валанцёраў, дзяцей з гарадзенскага дзіцячага хоспісу і іхных бацькоў. Усе сабраныя сродкі пойдуць на дапамогу хоспісу.
Евангелістычна-лютэранская супольнасць Гародні актыўна супрацоўнічае з дзіцячым хоспісам, дапамагаючы арганізоўваць дабрачынныя акцыі. Апошнія два гады запар гарадзенская кірха становіцца месцам прэзентацыі мюзыкла, які дзеці-інваліды выконваюць для жыхароў горада.
[Not a valid template]
Беларускае Радыё Рацыя, Гародня
