Як Святлану Алексіевіч сустракалі ў Менску
Некалькі соцень беларусаў сустракалі ў аэрапорце Нобелеўскага лаўрэата па літаратуры Святлану Алексіевіч, якая вярнулася са Стакгольма ў Менск. Варта таксама адзначыць, што ніхто з афіцыйных прадстаўнікоў улады сустрэць Алексіевіч не прыехаў.
(Фота Максіма Хлябца)
(Фота nn.by)
(Фота Барыса Гарэцкага)
(Відэа nn.by)
Сярод тых, хто сустракаў Алексіевіч, былі вядомыя палітыкі Аляксандр Мілінкевіч, Аляксандр Фядута, Таццяна Караткевіч, Аляксей Янукевіч.
Пісьменніцу сустрэлі крыкамі „Ура!” і „Дзякуй!”, многія прыйшлі з кветкамі.
Алексіевіч сказала, што ёй вельмі радасна бачыць так шмат людзей. Паводле слоў пісьменніцы, яна „крышку захварэла” і „крышку стамілася”.
Каментуючы па просьбе журналістаў адсутнасць у аэрапорце дзяржаўных СМІ і афіцыйных асоб, Святлана Алексіевіч сказала: „Гэта зразумела”. Яна таксама дадала, што не чакала прысутнасці чыноўнікаў. „Мяне сустракае народ”, – падкрэсліла Алексіевіч.
У бліжэйшых планах Нобелеўскага лаўрэата – „проста адпачыць”.
Рашэнне пра прысуджэнне Святлане Алексіевіч прэміі па літаратуры было абнародаванае Нобелеўскім камітэтам 8 кастрычніка. Прэмія ўручана за „шматгалосае гучанне прозы і ўвекавечванне пакутаў і мужнасці”.
10 снежня кароль Швецыі Карл XVI Густаў уручыў беларускай пісьменніцы медаль і дыплом Нобелеўскага лаўрэата на ўрачыстай цырымоніі ў Стакгольме.
Ні цырымонію ўзнагароджання, ні прамову Нобелеўскага лаўрэата беларускія тэлеканалы не транслявалі.
Глядзіце таксама
