Пракуратура ўслед за міліцыяй не пабачыла крыміналу ў абразе журналіста
Па факце абразы не толькі журналіста-фрылансера, але і яго сям’і, крымінальную справу не пачалі. Міліцыя і пракуратура па-просту не знайшлі вінаватых.
На адным з “дзіўных сайтаў” за апошні час з’явілася шмат абразлівых і паклёпніцкіх артыкулаў на адрас гарадзенскіх актывістаў і журналістаў. Адзін з тых, на каго скіраваныя гэтыя пасквілі – Андрэй Мялешка – вырашыў не замоўчваць такія факты і падаў адпаведную заяву спачатку ў міліцыю, пазней – у пракуратуру.
“Асноўнае, чаму я вырашыў змагацца, гэта тое, што там абражаныя гонар і годнасць маёй сям’і – жонкі і бацькоў, а таксама маіх калег па працы”, – кажа Андрэй. Агулам на паклёпніцкім сайце з’явіліся тры матэрыялы пра яго.
– У апошнім матэрыяле, які з’явіўся прыкладна месяц таму, пішуць, што я журналіст-фрылансер Беларускага Радыё Рацыя, і што я ўвогуле не маю права называцца журналістам, і потым пачынаецца паліванне брудам маёй сям’і. Я падаваў заяву ў міліцыю яшчэ ў жніўні, прыйшла адмова, і мы падалі заяву ў пракуратуру. Гарадзенская пракуратура праводзіла праверку, каб вырашыць, ці з’яўляецца паклёпам і крымінальным злачынствам непраўдзівая інфармацыя, размешчаная на тым сайце. У выніку пракуратура адмовіла ў распачацці крымінальнай справы.
Раней, прыгадаем, і міліцыя Кастрычніцкага раённага ўпраўлення ўнутраных спраў адмовіла журналісту ў пачацці крымінальнай справы па артыкуле “паклёп”. У адмове гаварылася пра тое, што змест артыкулаў фармальна мае прыкметы паклёпу (арт. 188 КК РБ), аднак не высветленая мэта, з якой нехта гэта зрабіў. Таксама праваахоўнікі не выявілі адміністратара сайту, паслугі хостынгу якому аказвае расейская кампанія ў Санкт-Пецярбургу.
РР: Якая аргументацыя гучыць у адказе пракуратуры?
– Аргументацыя распісаная на трох аркушах паперы: падрабязнасці майго запыту і апісанне таго, што рабілі міліцыянты. А міліцыянты даведаліся, дзе даменная імя сайту знаходзіцца, хто быў адміністратарам старонак вКонтакте, прывязаных да гэтага сайту. Былі апытаныя пэўныя людзі, указаныя іх прозвішчы. І праваахоўнікі ў выніку прыйшлі да высновы, што гэтыя людзі ніякага дачынення да гэтага сайту не маюць.
РР: То бок міліцыянты проста не знайшлі вінаватых?
– Так, выходзіць міліцыянты не знайшлі вінаватых, і таму справу не пачалі. Буду далей раіцца з юрыстамі БАЖу, і хочам давесці справу да выніку. На працягу двух месяцаў людзей, прывязаных да гэтага сайту, апытваюць, але адказу, які мяне задавальняе, надалей няма.
Падобныя паклёпы на журналістаў ужо былі ў Берасці, Магілёве і Гомелі, а таксама на шэраг гарадзенскіх журналістаў. Пакуль атрымліваецца, што ў Гародні Андрэй – адзіны, хто вырашыў з гэтым змагацца.
Адметна, што сайт, на якім размешчаныя паклёпніцкія матэрыялы, ужо ад пэўнага часу не адкрываецца. Андрэй Мялешка кажа, што не адмовіцца ад далейшых крокаў па выяўленні адказных за паклёпы.
[Not a valid template]
Яна Запольская. Беларускае Радыё Рацыя
