Мітынг прадпрымальнікаў – жанчыны на плошчы
Несанкцыянаваная акцыя прадпрымальнікаў у Менску сабрала шмат маніфестантак. Нават прагучала думка, што ў часы дыктатуры першымі наважваюцца на пратэст менавіта жанчыны.
Адзіны бел-чырвона-белы сцяг над Кастрычніцкім пляцам, як заўжды, трымала на флагштоку Ніна Багінская:
– Я лічу, што ў нас эканоміку загубілі, бо ў нас дыктатарскае кіраванне. Эканоміку мусяць ствараць людзі, павінна быць прыватная ўласнасць. Улады мусяць даць людзям магчымасць працаваць. А ў іх забіраюць працу, штрафуюць, бо пустая казна.
На акцыі згадалі і тых прадпрымальніц, якія выступалі тут тыдзень таму, – Соф’ю Мецяшову і Ірыну Яскевіч.
Актывістка “Беларускай хрысціянскай дэмакратыі” Вольга Кавалькова прыйшла на плошчу, каб сабраць подпісы за адмену ўказа №222, з-за якога не могуць працаваць ІП:
– Людзей, канешне, сёння няшмат з-за дрэннага надвор’я. Але я спадзяюся, што акцыі будуць працягвацца, і штосьці ў гэтым кірунку мы зможам разам зрабіць.
Агульная колькасць удзельнікаў акцыі на Кастрычніцкай плошчы ў Менску не перавысіла трох соцень. Наступны мітынг прадпрымальнікаў пройдзе ў бліжэйшую нядзелю, 28 лютага. Пачатак а 15-ай гадзіне.
Стас Дэдэрка, Беларускае Радыё Рацыя, Менск
Глядзіце таксама
