Падазроны “спявак” з кантрабандай трапіў у рукі падляшскіх мытнікаў
Кантрабанду ў 6 тысяч пачак цыгарэт выкрылі на польска-беларускім памежным пераходзе ў Кузніцы.
Схаваныя цыгарэты агульнай вартасцю 75 тысяч злотых мытнікі знайшлі ў шасці калонках у Мерсэдэсе на балгарскіх рэгістрацыйных нумарах, кажа прэс-сакратар мытнай службы ў Беластоку Мацей Чарнэцкі:
— Кіроўца аўтамабіля — 57-гадовы мужчына, які меў балгарскі і малдаўскі пашпарты, сцвярджаў, што ён спявак і едзе у Варшаву на канцэрт. І нават паказаў рэкламныя плакаты са сваёй выявай. Аднак, у часе агляду музычных калонак высветлілася, што яны хутчэй за ўсё былі б малапрыдатнымі на канцэрце, бо яны былі цалкам запоўненыя цыгарэтамі з расейскімі акцызнымі маркамі.
Супраць кіроўцы мытная служба распачала справу. канфіскаваны нелегальны тавар і машына. Кантрабандысту-спеваку пагражае вялікі штраф.
Лукаш Леанюк, Беларускае Радыё Рацыя, Беласток
