Пад Бараўлянамі загарэўся аўтобус з 34 пасажырамі
Інцыдэнт адбыўся 4 сакавіка, каля 16.10, на трасе М3 (Менск — Віцебск), паблізу Бараўлянаў. Пра гэта auto.tut.by паведаміў чытач. Дзякуючы зладжаным дзеянням міліцыі і выратавальнікаў удалося пазбегнуць сур’ёзных наступстваў. Пацярпелых няма.
Па словах чытача, пажар пачаўся ў раёне задніх колаў аўтобуса. Пасажыры хутка пакінулі салон і пачалі здымаць тое, што адбываецца, на тэлефоны, а кіроўца паспрабаваў справіцца з агнём самастойна, але марна.
«У лічаныя хвіліны агонь разгарэўся ў задняй частцы аўтобуса. Час ад часу ў ніжняй частцы транспартнага сродку раздаваліся нейкія выбухі, ад жару пачало лопацца шкло. Здавалася, яшчэ крыху і будзе сур’ёзны выбух», — апісаў здарэнне мужчына.
Міліцыянты, якія прыбылі на месца здарэння, агарадзілі аўтобус і перакрылі частку дарогі, а таксама «літаральна выцягнулі кіроўцу, які да апошняга змагаўся з агнём, з-пад палаючага аўтобуса» і адагналі пасажыраў, якія спрабавалі «закідаць аўтобус снегам».
Як распавялі ў МНС, да прыбыцця ратавальнікаў гарэў маторны адсек і задняя частка салона аўтобуса, які ехаў з Менска ў санаторый «Рудня» Лагойскага раёна. Акрамя кіроўцы, у аўтобусе знаходзіліся 34 пасажыры — усе яны пакінулі салон.
У выніку пажару быў выпалены маторны адсек, пашкоджаная задняя частка салона аўтобуса.
Паводле TUT.BY
