Андрэй Фёдараў: Па самых сур’ёзных пытаннях дамовіцца, відаць, не ўдалося
Менскі саміт з удзелам прэзідэнтаў Украіны і Расеі пакінуў пасля сябе шмат пытанняў. Ці спыніцца пасля гэтага вайна ва Украіне? Ці будзе знойдзена кампраміснае рашэнне паміж Крамлём і Кіевам? Вынікі сустрэчы падводзіць палітолаг Андрэй Фёдараў.
Андрэй Фёдараў: Пакуль цяжка даваць нейкія ацэнкі, бо не ўсё ж вядома. Так, добра, што канфліктуючыя бакі сустрэліся і пагутарылі. І гэта, здаецца, адзіны станоўчы вынік, пра які можна сказаць канкрэтна. У астатнім рашэнні, калі і былі прынятыя, то не факт, што будуць выконвацца. Трэба пачакаць рэальных вынікаў перамоваў. Мы іх зусім хутка ўбачым па тых падзеях, што будуць адбывацца ва Украіне.
РР: Пуцін сустрэўся адзін на адзін з Парашэнкам, але ізноў-такі мала канкрэтыкі па выніках перамоваў. На ваш погляд, чаму?
Андрэй Фёдараў: Відаць, не ўдалося дамовіцца па самых сур’ёзных пытаннях. Няма чым парадаваць свае народы прэзідэнтам. Думаю, калі б агульнае станоўчае рашэнне знайшлі, то хаваць яго не было б сэнсу.
РР: Прагучала, што Расея і Україна, магчыма, узмацняць кантроль на мяжы. Пойдзе на такі крок Масква?
Андрэй Фёдараў: У мяне ёсць вялікія сумненні. Расея ставіць перад сабой на мэту, калі не поўнасцю разваліць Украіну, то, ва ўсялякім выпадку, трымаць яе ў пастаянным напружаным стане, каб дасягнуць свае геапалітычныя мэты. Паўтаруся, пачакаем вынікаў, бо ніякіх канкрэтных дамоўленасцей не было.
РР: Па словах Пуціна, Расея не можа дамаўляцца па ўмовах спынення агню ва Украіне, бо гэта ўнутраная справа самой Украіны. Лідары ж так званай ДНР ужо кажуць нават не пра федэралізацыю, а разглядаюць толькі ўласную незалежнасць. Такое ўвогуле магчыма?
Андрэй Фёдараў: Пры пэўных умовах – так, але на сёння не рэальна. Расея ўвогуле займае, мякка кажучы, цікавую пазіцыю. Здаецца, яна ў вайне і ні пры чым, хоць усім добра вядома адкуль і чые вушы тырчаць. Калі б Крэмль супакоіўся, то бунт сепаратыстаў ва Украіне даўно падавілі б украінскія сілы, якія, да слова, не ў лепшым стане. Падтрымліваць сепартыстаў з-за вугла – гэта не прыстойна для краіны. У выніку зараз на Усходзе Украіны ідзе такая крывавая валтузня, што многім наогул цяжка зразумець, што там адбываецца на самай справе. Зразумела адно – калі б не Расея, то канфлікт ужо вырашыўся б. Ці заставяць Крэмль адмовіцца ад сваёй палітыкі? Пакуль гэта не атрымоўваецца.
РР: Калі пасля перамоваў у Менску вайна ва Украіне працягнецца, ці можна сказаць, што яны закончыліся правалам?
Андрэй Фёдараў: Лепш сказаць, што не прынеслі поспеху. Але, калі масштабы ваенных дзеянняў хоць трохі скарацяцца, значыцца ўжо будзе нейкі вынік. Застаецца спадзявацца на лепшае…
Кастусь Заблоцкі, Беларускае РадыёРацыя
Фота arche.by
Глядзіце таксама
