Рышард Чарнэцкі: Мы хочам крок па кроку адклейваць Беларусь ад Расеі (абноўлена)
У Бруселі завяршае сваю працу каардынацыйная група Беларусь – Еўразвяз. Гэта новы фармат структураванага комплекснага дыялогу паміж Беларуссю і Еўразвязам які засяроджаны на супрацоўніцтве з прадстаўнікамі афіцыйнага Менску.
Сустаршыня Еўрапейскага парламенту ад кансерватараў Рышард Чарнэцкі адзначае, што ранейшая палітыка ізаляцыі афіцыйнага Менску не прынесла поспехаў:
— Мы ўсё цяпер чакаем на плён у Беларусі. Ужо цяпер вельмі важна, каб Менск паступова быў штораз бліжэй да заходняга свету, а не Масквы. Мы хочам крок па кроку адклейваць Беларусь ад сувязяў з Расейскай Федэрацыяй. Мяркую, што для самога Менска, не толькі для ўлады, але і для беларускага народу гэта галоўнае. І такая палітыка, палітыка пэўнай раўнавагі — карысная.
«Кожная сустрэча , якая прыбліжае Беларусь да Еўропы, ёсць важнай і патрэбнай,» – сказала, каментуючы новы этап у беларуска-еўрапейскіх дачыненнях сустаршыня рабочай групы па справах Беларусі ў «Еўранэсце» Агнешка Казлоўска-Раевіч. Стартаваў новы фармат структураванага комплексу дыялогу паміж Беларуссю і Еўрапейскім звязам.
– Мяркую, што гэта этап пацяплення ў стасунках ЕЗ і Беларусі. І гэтае шырэйшае адкрыццё тычыцца не толькі сферы ўрада, але і беларускага грамадства. Гэта два каналы камунікацыі, якія не выключаюць адзін аднаго. І я спадзяюся, што наступіць момант, калі ўдзельнікі ўсіх гэтых сустрэч змогуць сесці за адзін стол. Вельмі хочацца верыць у гэта.
Менск і Брусель пачалі новы этап дыялогу па тэмах гандлю, энергетыкі, мытных спраў, а таксама правоў чалавека.
Праверкай для афіцыйнага Менску ў пацяпленні стасункаў з Бруселем стануць парламенцкія выбары – лічыць сустаршыня рабочай групы па справах Беларусі ў „Еўранэсьце” Агнешка Казлоўска-Раевіч. Чакаем прадстаўнікоў беларускага Парламенту ў „Еўранэсце”, але гэта стане магчымым, калі выбары будуць прызнаныя міжнароднай супольнасьцю:
– Калі выбары пройдуць у лепшай атмасферы, чым гэта было раней, то пацяпленне стасункаў, якое мы наглядаем цягам некалькіх апошніх месяцаў, магло б змяніць адносіны ў лепшы бок. Гэта было б вельмі пажадана.
Філосаф і грамадскі актывіст Уладзімір Мацеквіч адзначае, што ўлады не зрабілі ніводнага кроку насустрач рэкамендацыям міжнароднай супольнасьці ў справе выбарчага заканадаўстава:
– Нават калі лаяльных людзей, тых, якія калісьці былі ў апазіцыі, дапусцяць у гэты парламент, то гэта будуць не абраныя дэпутаты, а прызначаныя. Ці дасць гэта магчымасць прызнаць гэты парламент і ўключыць яго ў „Еўранест”? Калі не будуць празрыстымі выбары, калі яны не будуць сапраўднымі, то і прызнаваць гэты прызначаны парламент ніякіх падставаў няма.
Афіцыйны Менск і Брусель пачалі працаваць ў новым фармаце. Створана каардынацыйная група Беларусь — Еўрапейскі Звяз, якая мае намер сустракацца 2 разы ў год.
Беларускую дэлегацыю на гэтых перамовах узначальвала намесніца міністра замежных спраў Алена Купчына, дэлегацыю Еўразвязу ачольвала намесніца генеральнага сакратара Еўрапейскай службы знешніх дзеянняў Хэльга Шміт.
Валя Лаеўская, Беларускае Радыё Рацыя
Глядзіце таксама
