Амбасадара Польшчы выклікалі ў МЗС Расеі з-за «Начных ваўкоў»
Амбасадар Польшчы ў Расеі Катажына Пэлчыньска-Налэнч выкліканая ў расейскі МЗС з-за адмовы Польшчы дазволіць уезд у краіну ўдзельнікам мотапрабегу, арганізаванага клубам «Начныя ваўкі».
Лідар мотаклуба «Начныя ваўкі» Аляксандр Залдастанаў па мянушцы Хірург вядомы як прыхільнік прэзідэнта Расеі Уладзіміра Пуціна і адзін з лідараў праўладнага руху «Антымайдан». Улады краін Еўропы, ЗША і некаторых іншых дзяржаў уключылі яго ў «чорны спіс» — яму, у прыватнасці, забаронены ўезд у гэтыя краіны.
Еўрапейскія ўлады адмоўна ўспрымаюць ініцыятывы расейскіх праўладных актывістаў правесці аўтапрабегі на тэрыторыі ЕС, расцэньваючы падобныя дзеянні як правакацыю.
У 2015 годзе Польшча адмовілася прапусціць на сваю тэрыторыю «Начных ваўкоў», а на тэрыторыі Германіі высветлілася, што Берлін ануляваў візы некаторым з іх.
Раней прэс-сакратар польскай амбасады ў Маскве Барташ Ціхоцкі заявіў, што ўдзельнікаў мотапрабегу не прапусцяць на тэрыторыю Польшчы.
