У Менску прайшла сустрэча з Янкам Запруднікам
У Менску прэзентавалі “Кантакты” – гэта кніга выдадзеная да 90-годдзя Янкі Запрудніка, выбітнага дзеяча беларускай дыяспары ў ЗША.
[youtube id=”_8iLalFF5es”]
Асновай матэрыялу сталі лісты, якія пісалі яму шараговыя і вядомыя беларусы з метраполіі. Гаворыць укладальніца кнігі Натальля Гардзіенка:
– Кніга ад пачатку задумвалася менавіта, як кніга лістоў да Янкі Запрудніка. Кніга выглядала б па-іншаму, калі былі б лісты самога Янкі Запрудніка, але ў гэтым варыянце – гэта не толькі пра Янку Запрудніка, але і пра беларусаў, якія яму пісалі.
Сярод герояў кнігі – айцец Аляксандр Надсан, дысідэнт Міхась Кукабака, Станіслаў Шушкевіч ды многія іншыя. Юбіляр наведаў прэзентацыю “Кантактаў” асабіста:
– Вельмі ўзрушаны, я ніколі не думаў, што столькі цяпла, столькі сардэчнасці, столькі цёплых пажаданняў – гэта сапраўды зарад на ўсе далейшыя гады працы і спадзяванняў.
Прэзентацыя кнігі “Кантакты” да юбілею Янкі Запрудніка зацягнулася болей чым на 3 гадзіны. Заля дзяржаўнай бібліятэкі імя Пушкіна не здолела змясціць усіх жадаючых.
Стас Дэдэрка, Беларускае Радыё Рацыя, Менск
