У Баранавічах спрабавалі разагнаць выбарчы пікет
Пікет па зборы подпісаў за Таццяну Малашчанку не спадабаўся ахове крамы “Карона” ў Баранавічах.
Начальнік змены аховы патрабаваў або спытаць дазволу у яго начальства на правядзенне пікету, або пакінуць тэрыторыю, – кажа удзельнік пікету, сябра ініцыятыўнай групы Таццяны Малашчанкі Мікалай Падгайскі:
– Мы сказалі, што нам дазвол не патрэбны. Узнікла спрэчка. Ахоўнік выклікаў міліцыянта. Усе тэлефанавалі, спрабавалі разабрацца. У рэшце рэшт разабраліся, што мы маем рацыю і нас ніхто не мае права прагнаць. Мы працягвалі свой пікет. Міліцыянт таксама стаў на наш бок. І той ахоўнік ціхенька сышоў.
Паводле праваабаронцы Аляксандра Вайцешыка, які прысутнічаў падчас інцыдэнту, міліцыянт, у адрозненне ад начальніка аховы змены, вёў сябе спакойна і карэктна.
У Беларусі працягваецца этап вылучэння прэтэндэнтаў у кандыдаты ў дэпутаты Палаты прадстаўнікоў. Парламенцкія выбары пройдуць 11-га верасня.
Беларускае Радыё Рацыя, Баранавічы
