Узброены захоп аддзела паліцыі ў Ерэване (абноўлена)
У Ерэване праваахоўныя органы пачалі аперацыю па вызваленні закладнікаў, захопленых у будынку паліцыі. Пра гэта паведамляе РІА Навіны са спасылкай на іншыя СМІ.
Пра пачатак аперацыі піша агенцтва «Спадарожнік Арменія» са спасылкай на карэспандэнта. У іншых крыніцах інфармацыі пра пачатак аперацыі пакуль няма.
У ноч на нядзелю, 17 ліпеня, група ўзброеных людзей напала на будынак паліцыі і ўнутраных войскаў у раёне Эрэбуні горада Ерэвана, піша Arminfo. У выніку перастрэлкі ёсць забітыя і параненыя, па непацверджаных дадзеных, у час узброенага нападу тыя, хто нападаў, узялі ў закладнікі афіцэра паліцыі Арменіі, удакладняе агенцтва.
Напад ажыццявілі ўзброеныя прыхільнікі кіраўніка руху «Новая Арменія» Жырайра Сефіляна, якога ўлады абвінавацілі ў незаконным набыцці і захоўванні зброі. Паводле інфармацыі News.am, напад здзейснены на полк патрульна-вартавой службы паліцыі Арменіі. Тыя, хто знаходзіўся на тэрыторыі палка, узятыя ў закладнікі. Агенцтва спасылаецца на інфармацыю прэс-цэнтра Службы нацыянальнай бяспекі Арменіі, які паведаміў, што адначасова з нападам былі зроблены спробы «з дапамогай сацыяльных сетак распаўсюдзіць дэзінфармацыю пра пачатак паўстання і захоп будынкаў».
„Інтэрфакс” паведамляе, што падчас захопу адзін чалавек загінуў, яшчэ некалькі атрымалі раненні. Захопнікі патрабуюць вызваліць з-пад арышту каардынатара армянскай апазіцыйнай грамадзянскай ініцыятывы «Устаноўчы парламент» Жырайра Сефіляна. Са спасылкай на мясцовыя СМІ агенцтва таксама паведаміла, што ў закладніках утрымліваецца намеснік начальніка паліцыі Ерэвана Валерый Асіпян.
Да будынка сцягнутыя войскі, на месца прыбыў начальнік паліцыі Арменіі Уладзімір Гаспаран.
Сефілян быў затрыманы 20 чэрвеня. Следства лічыць, што ён у складзе групы планаваў узброены захоп будынкаў, пабудоў, сродкаў тэлекамунікацый пасля красавіцкага абвастрэння ў зоне карабахскага канфлікту.
Паводле rbc.ru
Глядзіце таксама
