Наталля Радзіна: Заказчыкі забойства Шарамета могуць быць адкуль заўгодна
“Павел дамагаўся поспеху ва ўсіх сваіх праектах і заўсёды раздражняў тых, каму было, што хаваць,” – заявіла галоўны рэдактар charter97.org Наталля Радзіна, каментуючы забойства ў Кіеве беларускага журналіста Паўла Шарамета.
“Паўла справядліва можна называць беларуска-расейска-ўкраінскім журналістам.
Ва ўсіх гэтых трох краінах ён дамогся вядомасці: пачынаў у Беларусі ў незалежнай прэсе, стаў асабістым ворагам Лукашэнкі (ён любіў так сябе называць, але гэта было праўдай), трапіў у турму як карэспандэнт ОРТ, пасля вызвалення перабраўся ў Расею, а калі сталі «закручваць гайкі» і там, з’ехаў працаваць у Кіеў.
Ён быў прафесіяналам, таму хутка дамогся поспеху і там.
Раздражняў многіх – што ў Беларусі, што ў Расеі, што ва Украіне, таму што быў рэзкім, не саромеўся ў эпітэтах, навешваў ярлыкі, зрываў пакровы. Але заўсёды быў цікавым. З ім ніколі не было сумна.
Пазіцыі нашы часта не супадалі, лаяліся мы з ім да хрыпаты, але заўсёды, адразу ж, па яго ж ініцыятыве, мірыліся. І немагчыма было на яго доўга злавацца…
Хто яго забіў – не ведаю. Але заказчыкі могуць быць адкуль заўгодна, у тым ліку з Менска,” – сказала Наталля Радзіна.
Глядзіце таксама
