Міжнародны фестываль фальклору «Падляшскія сустрэчы»
Фальклор розных народаў прэзентавалі ў Бельску-Падляшскім. У рамках Міжнароднага фестывалю фальклору «Падляшскія сустрэчы» сваю творчасць бяльшчанам паказалі народныя калектывы з ЗША, Македоніі, Краіны Баскаў ды Грузіі.
Мерапрыемства пачалося з прэзентацый выканаўцаў на плошчы Яна Паўла ІІ (што пад бельскай ратушай), якія пасля перайшлі ў гарадскі амфітэатр, дзе выступілі з канцэртамі. Сярод іх быў і грузінскі харэаграфічны калектыў «Вардзія» з Тбілісі. Кажа іх кіраўнік Бадры Грылала:
– Мы ехалі сюды 3 сутак з Грузіі. Нашы народныя танцы вельмі тэмпераментныя, ёсць нват танец са шчытом і мячом.
У рамках Міжнароднага фестывалю фальклору «Падляшскія сустрэчы» выступяць таксама калектывы з Чэхіі, Украіны і Тайваня. Бліжэйшы канцэрт пройдзе ў горадзе Высокае Мазавецкае (што на захадзе Падляшша), пачатак імпрэзы ў 17:30. Агулам фестываль працягнецца да 7 жніўня і завершыцца гала-канцэртам у Браньску (што на Бельшчыне). Галоўным арганізатарам Міжнароднага фестывалю фальклору «Падляшскія сустрэчы» выступіла Мастацкае таварыства «Скавронкі»(«Skowronki”).
[Not a valid template]
Мацей Рацінеўскі, Беларускае Радыё Рацыя, Бельск-Падляшскі
Фота аўтара
