Аднаўляецца чыгуначнае пасажырскае злучэнне паміж Гародняй і Польшчай
Упершыню з Гародні ў заходнім кірунку будуць курсіраваць вагоны купэйнага тыпу.
У канцы 2015 гады цягнік на маршруце Беласток – Гародня быў адменены з-за фінансавай нерэнтабельнасці. Дзякуючы грашовай падтрымцы з бюджэту Польшчы, з 4-га верасня 2016 года міжнародны цягнік зноў будзе курсіраваць з Гародні да Беластока і назад. Больш за тое, каб акупіць затраты, маршрут вырашылі падоўжыць не толькі да Варшавы, але і да Кракава.
Расклад цягніка Гародня – Беласток – Варшава – Кракаў:
Гародня 15:32 Кузніца 15:10 (прыбыццё), 16:14 (адпраўленне) Беласток 17:08 Варшава 20:15 Кракаў 23:04
* * *
Кракаў 04:46 Варшава 07:32 Беласток 10:36 Кузніца 11:31 (прыбыццё), 00:44 (адпраўленне) Гродна 14:22
Час мясцовы, летні расклад
Польскі цягнік, які абслугоўвае маршрут да Гародні, упершыню будзе мець камфартабельныя вагоны купэйнага тыпу з сядзеннямі – мяккімі месцамі. Выкарыстанне падобных вагонаў зразумелае, бо „страшненькія” электрычкі, якія да гэтага часу курсіравалі па маршруце Гародня – Беласток, сорамна паказваць у Варшаве або ў перапоўненым турыстамі культурным Кракаве.
Але выкарыстанне тых цягнікоў таксама было зразумелым. Цягнік фінансава нявыгадны: у Гародні няма такога патоку шукальнікаў прытулку, як на паўднёвых рубяжах Беларусі, дзе цягнік з Берасця на Цярэспаль штодня акупляецца дзякуючы пасажырам-мігрантам з Расеі, якія спрабуюць атрымаць статус бежанцаў у Еўропе. Асноўны кантынгент падарожнікаў на цягніку з Гародні ў Польшчу – гэта ўладальнікі карты паляка, якім у Польшчы прадастаўляецца зніжка ў 37% на праезд цягнікамі, а таксама асобы, якія едуць далей, чым да Беластока.
Яшчэ адной прычынай выкарыстання «дабітых» цягнікоў праз польска-беларускую мяжу была рэгулярная кантрабанда цыгарэт у Польшчу. „Майстравітыя” беларускія хлопцы і нават дзяўчаты разбіралі цягнік і хавалі цыгарэты, змушаючы чыгуначнікаў фактычна быць саўдзельнікамі, а ўсіх пасажыраў – міжвольнымі сведкамі перавозкі кантрабанды.
Зрэшты, пакуль яшчэ камфартабельныя вагоны чакаюць пасажыраў, і з верасня з Гародні можна будзе без перасадак дабрацца да культурна-гістарычнай сталіцы Польшчы – Кракава.
Фота euroby.info
