Штодзённыя пікеты ў падтрымку бел-чырвона-белага сцяга
Зміцер Дашкевіч працягвае шэраг штодзённых пікетаў у падтрымку бел-чырвона-белага сцяга.
Палітык распачаў збор подпісаў за прызнанне нацыянальнага сцяга нематэрыяльнай гісторыка-культурнай каштоўнасцю. Сваю акцыю Дашкевіч праводзіць у пераходзе ля выхаду са станцыі метро «Кастрычніцкая».
«Мы прыйшлі збіраць подпісы, бо хочам каб нацыянальны сцяг быў афіцыйна прызнаным,» — гаворыць палітык Зміцер Дашкевіч:
— Бо гэта ганьба калі шматсотгадовы беларускі нацыянальны сімвал да сённяшняга дня ў нашай дзяржаве лічыцца незарэгістраванай сімволікай, як яны любяць пісаць у пратаколах. Гэта ганьба, што сцяг, які 4 гады у найноўшай гісторыі у нас быў дзяржаўным, лічыцца нейкім «незарэгістраваным» і невядома чым.
«Перш за ўсё бел-чырвона-белы сцяг з’яўляецца сімвалам сапраўднай незалежнасці,» — дадаў Зміцер Дашкевіч. Збор подпісаў трываў каля 2 гадзін.
Цягам акцыі было сабрана амаль 200 подпісаў. Штодзённы збор подпісаў, апроч нядзельнага дня, Дашкевіч плануе весці да сярэдзіны кастрычніка.
У акцыі прынялі ўдзел палітыкі Павал Севярынец, Мікола Аўтуховіч і іншыя. Пікет прайшоў без затрыманняў.
Алесь Вайтовіч, Беларускае Радыё Рацыя, Менск
Фота: „Наша Ніва”
