У Менску быў затрыманы Зміцер Дашкевіч (абноўлена)
Як стала вядома, Зміцер Дашкевіч вызвалены з будынка Першамайскага РУУС сталіцы.
* * *
У Менску ў раёне Камароўскага рынку затрыманы адзін з лідараў зарэгістраванага ў Чэхіі грамадскага аб’яднання «Малады Фронт» Зміцер Дашкевіч, паведаміла яго жонка Анастасія Дашкевіч.
Змітра Дашкевіча зацягнулі ў мікрааўтобус, за якім ехала міліцэйская машына, паведаміла яна. Дзе зараз знаходзіцца Дашкевіч, невядома.
Сёння Дашкевіч планаваў прыняць удзел у пікеце ў цэнтры Менска каля крамы „Цэнтральны”. Акцыя павінна была пачацца ў 11 гадзін і, паводле задумы яго арганізатараў, працягнуцца да 20 гадзін.
На пікеце актывісты «Маладога Фронту» маюць намер збіраць подпісы пад зваротам у Міністэрства культуры за наданне бел-чырвона-беламу сцягу статусу нематэрыяльнай гісторыка-культурнай каштоўнасці.
Пра пачатак збору подпісаў было абвешчана 19 верасня па завяршэнні акцыі «Праспект нацыянальнага сцяга» ў Менску. Дашкевіч заяўляў, што плануе збіраць подпісы кожны дзень, акрамя нядзелі.
24 верасня ў Менску адбудзецца закрыццё мотасезона. У ім возьмуць удзел каля 4000 байкераў з Беларусі, Расеі, Прыбалтыкі, краін Заходняй Еўропы. У мерапрыемстве, якое пачнецца а 12-й гадзіне, плануецца ўдзел Аляксандра Лукашэнкі. У раёне крамы «Цэнтральны», дзе плануе правесці акцыю «Малады Фронт», на дадзены момант засяроджана некалькі дзясяткаў супрацоўнікаў праваахоўных органаў.
Фота Ірыны Арэхоўскай
