Беларусь на трэцім месцы ў свеце па смяротнасці з-за забруджвання паветра
Беларусь знаходзіцца на трэцім месцы ў свеце па адноснай смяротнасці ад хвароб, звязаных з забруджваннем паветра. Першае месца займае Украіна, Расея – на чацвёртым. Пра гэта гаворыцца ў свежым дакладзе СААЗ аб забруджванні атмасфернага паветра.
Па дадзеных Сусветнай арганізацыі аховы здароўя, у нашай краіне з-за наступстваў забруджвання паветра памерла 100 чалавек на 100 000 насельніцтва. З такім паказчыкам Беларусь займае трэцяе месца ў свеце. Трэба звярнуць увагу, што дадзеныя аб колькасці смерцяў адносяцца да 2012 году, пры гэтым даклад СААЗ апублікаваны ў 2016-м.
Першае месца па адноснай смяротнасці займае Украіна (120 смерцяў на 100 000 насельніцтва), другое – Балгарыя (118 смерцяў на 100 000 насельніцтва). Расея на чацвёртым месцы з паказчыкам 98.
Па паказчыку абсалютнай смяротнасці лідзіруе Кітай. Там у 2012 годзе ад забруджвання паветра памерла больш за мільён чалавек.
Для параўнання, у Беларусі – 9450, ва Украіне – 54 507, у Расеі – амаль 141 000 чалавек. Пры гэтым Кітай ўсё роўна адстае ад Усходняй Еўропы па адноснай смяротнасці – 76 чалавек на 100 000 насельніцтва.
Па дадзеных СААЗ, каля 3 мільёнаў смерцяў па ўсім свеце ў год звязаны з уздзеяннем забруджанага паветра. 94% такіх смерцяў абумоўлены неінфекцыйнымі захворваннямі, такімі, як інсульт, рак лёгкіх, сардэчна-сасудзістыя захворванні. Забруджванне паветра таксама падвышае рызыку вострых рэспіраторных інфекцый.
Асноўныя крыніцы забруджвання паветра, па звестках СААЗ, – неэфектыўныя віды транспарту, спальванне адходаў, прамысловасць і вугальныя электрастанцыі.
Фота Белта
