Расатам: Рэактар, што ўпаў на БелАЭС, у выдатным стане
Расейскі бок згадзіўся замяніць рэактар, толькі саступаючы ціску грамадскай думкі ў Беларусі.
Пытанне з заменай корпуса для першага энэргаблоку Беларускай АЭС развяжацца ў рабочым парадку.
Пра гэта 27 верасня заявіў журналістам генеральны дырэктар Расатама Сяргей Кірыенка, паведамляе БелТА.
Ён сказаў, што беларускія калегі фактычна папрасілі замяніць корпус рэактара, які ўпаў падчас выпрабавальнай устаноўкі, і гэта будзе зроблена. Нягледзячы на гэты інцыдэнт, Кірыенка называе корпус абсалютна працаздольным і мяркуе, што ён можа быць выкарыстаны на іншых праектах. Са слоў кіраўніка Расатама, устаноўка новага корпуса не дадасць ніякіх выдаткаў, акрамя аплаты яго перавозкі.
Карпарацыя Расатом з’яўляецца падрадчыкам будаўніцтва атамнай электрастанцыі ў Астраўцы.
Сяргей Кірыенка таксама нагадаў, што Беларусь прыняла на сябе асноўны ўдар Чарнобыля, што можа ўплываць на грамадскую думку наконт атамнай энергетыкі. У сувязі з гэтым ён падкрэсліў, што разумее занепакоенасць не толькі тэхнічнымі рашэннямі, але і грамадскай прымальнасцю праекта.
«Таму мы цалкам дапускаем і з павагай ставімся да таго, што шэраг рашэнняў нашых беларускіх партнёраў можа тлумачыцца не тэхнічнымі патрабаваннямі, а камфортам грамадскай думкі. Мы будзем да гэтага ставіцца з вялікай павагай і разуменнем», — дадаў кіраўнік «Расатама».
