Улады гатовы прадаць „Крыніцу”, „Мастоўдрэў” і „Магілёўліфтмаш”?
27 верасня на прэс-канферэнцыі ў Менску стала вядома, што ўрад Беларусі прапанаваў Еўрапейскаму банку рэканструкцыі і развіцця (ЕБРР) правесці перадпродажную падрыхтоўку пяці дзяржпрадпрыемстваў. Хто можа трапіць у поле зроку замежных інвестараў? Гэта паспрабаваў высветліць TUT.BY.
Кіраўнік прадстаўніцтва ЕБРР у Беларусі Франсіс Дэлэй сказаў, што ў рамках новай стратэгіі, якая была зацверджана ў верасні гэтага года, ад урада Беларусі паступіў запыт на аказанне садзейнічання ў прыватызацыі пяці буйных дзяржаўных прадпрыемстваў.
Па ўсіх пяці праектах ЕБРР працаваць не зможа, паколькі перадпродажная падрыхтоўка – гэта дастаткова стратны занятак, сказаў банкір. «У цяперашні час мы праводзім комплексную ацэнку гэтых прадпрыемстваў, каб выбраць адно з іх», – растлумачыў Дэлэй. Калі перадпрыватызацыйная праца будзе завершана, на выбранае дзяржпрадпрыемства прыйдзе стратэгічны інвестар. «Мы лічым, што пытанне прыцягнення стратэгічнага інвестара можа быць вырашана на працягу пяці-шасці гадоў», – дадаў банкір. Называць гэтыя прадпрыемствы ён не стаў.
Разам з тым Франсіс Дэлэй пацвердзіў інфармацыю пра тое, што ЕБРР праяўляе цікавасць да Банка Масква-Менск, які таксама знаходзіцца ў дзяржуласнасці. «Мы выкарыстоўваем прыклад Белінвестбанка для таго, каб абмяркоўваць з урадам магчымасць паўтарэння гэтай гісторыі з дзяржаўным Банкам Масква-Менск», – сказаў кіраўнік прадстаўніцтва ЕБРР у Менску.
У цяперашні час Еўрапейскі банк рэканструкцыі і развіцця займаецца перадпродажнай падрыхтоўкай дзяржаўнага Белінвестбанка. Першы намеснік міністра фінансаў Максім Ермаловіч назваў дадзены прыклад «найбольш прымальным варыянтам прыватызацыі дзяржпрадпрыемстваў для ўрада». У размове з журналістамі ён пацвердзіў, што прапрацоўваецца праект працягу супрацы з ЕБРР у частцы прыватызацыі дзяржпрадпрыемстваў. Але таксама не назваў удзельнікаў.
Па словах адной з крыніц TUT.BY, знаёмых з ходам перамоў, «гаворка ідзе пра сярэднія беларускія дзяржпрадпрыемствы з розных сектараў эканомікі». «ЕБРР цікавы сярэднія прадпрыемствы і буйнейшыя. Плюс прадпрыемствы павінны быць жывучыя, а не забітыя. Павінна праглядацца перспектыва развіцця. Банк – не рэаніматолаг», – сказаў суразмоўца. У якасці фаварыта ён назваў піўзавод «Крыніца». Інфармацыю пра тое, што гэта прадпрыемства ёсць у спісе, пацвердзіла крыніца ў банкаўскіх колах. «Наколькі я ведаю, яшчэ ёсць прадпрыемствы, якія займаюцца дрэваапрацоўкай, стварэннем ліфтаў і жалезабетонных канструкцый», – сказаў ён, не ўдакладніўшы назвы прадпрыемстваў. Паводле інфармацыі TUT.BY, гаворка ідзе пра «Магілёўліфтмаш» і «Мастоўдрэў». «Гэта не „Белкалій „, вядома, але цалкам добрыя беларускія прадпрыемствы. Яны могуць быць цікавыя інвестарам,» – падсумаваў суразмоўца.
Паводле news.tut.by
Фота holiday.by
