Што маладыя беларусы ведаюць пра Еўропу?
У Берасці прайшла інтэлектуальная гульня-конкурс “Што я ведаю пра Еўропу?”.
На ім выступілі пяць моладзевых каманд з розных куткоў Беларусі, якія ў фармаце брэйн-рынгу адказвалі на пытанні датычныя тэматыкі мерапрыемства.
Кажа старшыня аргкамітэта конкурса Ігар Лялькоў:
– Праект існуе трынаццаты год, дванаццаць год праводзіўся конкурс сярод школьных каманд “Што я ведаю пра Еўропу?”. У гэтым годзе ён трошкі змяніў фармат, ён стаў конкурсам моладзевых каманд, што дазволіла пашырыць аўдыторыю не толькі на школьную моладзь, але таксама студэнты, навучэнцы каледжаў і гэтак далей. Мы лічым, што такі фармат будзе больш паспяховым.
У склад журы ўваходзілі бізнесмены і палітыкі. Вядоўцам імпрэзы быў Юрый Жыгамонт:
– Беларусь – гэта ж еўрапейская краіна, там было “Што я ведаю пра Еўропу?”, а не пра Усход. Гэта нармальна, лагічна, што нашы беларусы ведаюць пра еўрапейскія краіны, мяне вельмі парадавалі іх веды, хаця і не ўсе.
Пераможцамі берасцейскай гульні стала каманда з Наваградку, якая ўжо не першы год бярэ першыя месцы.
Берасцейцы ж, якія былі прадстаўлены дзвюма камандамі, былі дэбютантамі конкурсу і занялі трэцяе і пятае (апошняе) месцы. “Будзем рыхтавацца да наступнага года”, – зазначылі яны.
Мікола Ляшкевіч, Беларускае Радыё Рацыя, Берасце
