Меліціна Станюта плануе завяршыць кар’еру
Лідар нацыянальнай зборнай Беларусі па мастацкай гімнастыцы Меліціна Станюта плануе завяршыць спартыўную кар’еру ў бліжэйшы час. Пра гэта спартсменка, якой 15 лістапада споўніцца 23 гады, распавяла ў інтэрв’ю БелаПАН.
Прычынамі гэтага рашэння Станюта назвала старую траўму і боль у левай ступні, а таксама той факт, што яна «больш не знаходзіць у гімнастыцы натхнення».
«Ступня моцна баліць. Пасля Алімпіяды стала балець больш, прычым боль з’явіўся ў тым месцы, у якім раней яго не было. Я спадзявалася, што за адпачынак ён пройдзе, паколькі нагрузак на ступню не будзе. Не праходзіць. На левай назе я не магу рабіць пэўныя элементы. Штосьці рабіць з гэтай шматпакутнай ступнёй я не вельмі хачу. Плюс мне хутка 23 гады — гэта ўсё ж такі ўзрост для гімнастыкі.
Я 20 гадоў у спорце. З 1996 года я бачу гэтыя сцэны, гэтую залу. У мяне, напэўна, ужо няма эмацыйнага зараду, які б даваў псіхалагічныя сілы працягваць. Я не знаходжу больш у гімнастыцы натхнення. Унутраны голас мне ўсё настойлівей кажа, што больш я займацца гэтым не хачу», — распавяла Станюта.
Па словах спартсменкі, яна цяжка перажывала няўдалае выступленне на Алімпіядзе ў Рыа-дэ-Жанейра. На Гульнях-2016, на якіх Станюта разглядалася адной з галоўных фаварытак, яна не змагла заваяваць узнагароду праз дапушчаную памылку — выпусціла булаву падчас выступу.
«Я і сама разумею, што гэта памылка — гэта нейкі нонсэнс, — лічыць Станюта. — Дайце мне магчымасць паўтарыць выступ, я зраблю яго бездакорна сто, дзвесце, трыста разоў. Я не ведаю, чаму лёс так склаўся, чаму ён даў мне такое выпрабаванне, а гэта сапраўды было сур’ёзнае выпрабаванне для мяне. Разумееце, на Алімпіядзе ў Лондане я не была настолькі гатова, як на гэтай Алімпіядзе. Я настолькі адказна і паўнавартасна рыхтавалася да Гульняў у Рыа, што нават не магу сабе ўявіць, што можна было яшчэ зрабіць у плане падрыхтоўкі. Я зрабіла ўсё! Я лепш не магу! З аднаго боку, гэта крыўдна, што ты зрабіла абсалютна ўсё, але засталася без медаля. А з другога боку, калі ты зрабіла ўсё, за што сябе дакараць? Я сябе супакойваю так: значыць, маё шчасце не ў гэтым. Плюс я лічу, што мой галоўны медаль у гімнастыцы — гэта не факт наяўнасці алімпійскай узнагароды, а глядацкая любоў і ўвага», — сказала гімнастка.
Меліціна Станюта з’яўляецца шматразовым прызёрам чэмпіянатаў свету і Еўропы, заслужаным майстрам спорту Беларусі.
Фота s5o.ru
