Украіна мае намер часова закрыць мяжу з Расеяй
Прэзідэнт Украіны Пётр Парашэнка падпісаў указ, якім увёў у дзеянне рашэнне Рады нацыянальнай бяспекі і абароны Украіны (РНБА), накіраванае на неадкладныя меры па ўмацаванні абараназдольнасці краіны.
Пра гэта гаворыцца ва ўказе Прэзідэнта Украіны Пятра Парашэнкі № 744/2014 ад 24 верасня, якім уводзіцца ў дзеянне рашэнне РНБА ад 28 жніўні 2014 „Аб неадкладных мерах па абароне Украіны і ўмацаванні яе абараназдольнасці”, апублікаваным на сайце кіраўніка дзяржавы.
„Вырашыць ва ўстаноўленым парадку пытанне пра часовае закрыццё пунктаў пропуску на дзяржаўнай мяжы Украіны з Расейскай Федэрацыяй для аўтамабільнага, марскога, пешаходнага спалучэнняў і спынення руху праз іх, а таксама ў выпадку неабходнасці – пытанне адносна часовага закрыцця пунктаў пропуску для іншых відаў зносін”, – гаворыцца ў дакуменце.
Таксама РНБА рэкамендаваў Кабміну прыняць меры па правядзенню аднабаковай дэмаркацыі дзяржаўнай мяжы Украіны з Расейскай Федэрацыяй і забеспячэння яго належнага інжынерна-тэхнічнага абсталявання, у тым ліку з прыцягненнем міжнароднай тэхнічнай дапамогі.
РНБА таксама прапанаваў ураду разам са Службай бяспекі Украіны і выведчымі органамі Украіны забяспечыць дакументаванне фактаў парушэнняў рэжыму дзяржаўнай мяжы Украіны з боку Расейскай Федэрацыі і прадастаўленне адпаведных скаргаў (пазоваў) у міжнародныя судовыя органы.
Акрамя таго, РНБА рэкамендаваў Кабміну распрацаваць і падаць Прэзідэнту Украіны праект генеральных дырэктыў на перамовы з РФ, унесці ва ўстаноўленым парадку прапановы пра ўжыванне спецыяльных эканамічных мер (санкцый) у дачыненні да Расеі, а таксама вырашыць пытанне пра стварэнне цэнтралізаванай сістэмы лагістычнага забеспячэння вайсковых фармаванняў і праваахоўных органаў Украіны.
