У Бабруйску прэзентавалі кнігу пра дысідэнта Міхася Кукабаку
У Бабруйску прэзентавалі дакументальную кнігу, прысвечаную легендарнаму беларускаму дысідэнту Міхасю Кукабаку. Кніга „Міхась Кукабака” – гэта зборнік артыкулаў, інтэрв’ю і лістоў славутага іншадумца.
Праваабаронца Алесь Бяляцкі адзначыў, што яшчэ ў часы яго студэнцтва Міхась Кукабака стаў прыкладам супраціву сістэме.
– Ён сваім лёсам даказваў, што беларусы ў тыя гады таксама супраціўляліся таталітарнай сістэме. Яны цярпелі за гэта, як і цярпеў спадар Міхась.
За сваю актыўную пазіцыю Міхась Кукабака больш за шаснаццаць гадоў правёў у турмах ды псіхіатрычных лякарнях. Там ён дэманстраваў нязломнасць духу, ніколі не прасіў памілвання, не ішоў на патрабаванні ўлады.
Былы вязень распавёў пра „кропку адліку” у сваёй грамадзянскай дзейнасці.
– Спачатку гэта былі спантанныя акцыі – лісты пратэсту. Сапраўдны, выразна выказаны, пратэст прагучаў з нагоды акупацыі Чэхаславакіі, і я хацеў, каб мой пратэст быў пачуты за межамі краіны.
Кніга „Міхась Кукабака” падрыхтаваная Праваабарончым цэнтрам „Вясна” ды Цэнтрам даследванняў грамадзянскай супольнасці.
[Not a valid template]
Алена Вільтоўская, Беларускае Радыё Рацыя
Фота аўтаркі
