Акадэмія навук плануе даследаваць пытанне пра статус БЧБ сцяга
Нацыянальная акадэмія навук Беларусі збіраецца правесці „навуковае даследаванне з мэтай выяўлення арыгінальных архіўных дакументаў і матэрыялаў”, якія адказалі б на пытанне пра магчымасць надання бел-чырвона-беламу сцягу статусу нематэрыяльнай гісторыка-культурнай каштоўнасці. Пра гэта сказана ў адказе Міністэрства культуры на зварот „Маладога фронту”.
27 кастрычніка актывісты „Маладога фронту” (зарэгістраваны ў Чэхіі) перадалі ў Міністэрства культуры 10 тысяч 540 подпісаў, сабраных пад зваротам аб наданні бел-чырвона-беламу сцягу статусу нематэрыяльнай гісторыка-культурнай каштоўнасці.
У адказе, які атрымаў 23 снежня пры наведванні Мінкультуры адзін з лідараў „Маладога фронту” Зміцер Дашкевіч, гаворыцца, што ў пададзенай прапанове „не ўтрымліваецца дакументальнага яе абгрунтавання”, а таксама „поўнай, дакладнай і якаснай фіксацыі графічнымі сродкамі элемента, якому прапануецца надаць статус гісторыка-культурнай каштоўнасці”. Акрамя таго, адзначае Мінкультуры, „асобныя факты не падмацаваныя дакументальнымі крыніцамі, што не дазваляе прыняць іх у якасці абгрунтавання неабходнасці надання статусу нематэрыяльнай гісторыка-культурнай каштоўнасці прапанаванаму элементу”.
У сувязі з гэтым міністэрства перадало прапанову аб наданні статусу нематэрыяльнай каштоўнасці бел-чырвона-беламу сцягу ў Нацыянальную акадэмію навук. У адпаведнасці з заканадаўствам НАН можа правесці „навуковую апрацоўку нематэрыяльнай праявы творчасці чалавека і вызначыць яе адпаведнасць аднаму або некалькім крытэрам адбору для надання статусу гісторыка-культурнай каштоўнасці”.
Пры гэтым паведамляецца, што Міністэрства культуры ўжо атрымала з НАН інфармацыю, згодна з якой для падрыхтоўкі навуковага абгрунтавання калектыўнай прапановы грамадзян „неабходна правесці грунтоўнае навуковае даследаванне з мэтай выяўлення арыгінальных архіўных дакументаў і матэрыялаў, што патрабуе працяглай працы навукоўцаў і адпаведных фінансавых выдаткаў”. Прадстаўнікі Акадэміі навук таксама адзначылі, што „выкананне гэтай працы будзе ажыццяўляцца з улікам выдзялення сродкаў на навуковыя даследаванні ў новым фінансавым годзе”.
Каментуючы атрыманы адказ, Дашкевіч, з аднаго боку, выказаў здзіўленне з нагоды „глупства фармулёвак”, а з іншага — убачыў станоўчы момант у абяцанні НАН правесці работу па вывучэнні пытання. Пры гэтым ён прапануе ўсім „добра папрацаваць над тым, каб пашырыць кола патрыётаў нашага сапраўднага сцяга”.
Бел-чырвона-белы сцяг і герб „Пагоня” былі ўзаконеныя ў якасці дзяржаўнай сімволікі 19 верасня 1991 года Вярхоўным Саветам 12-га склікання. 14 мая 1995 года па ініцыятыве Аляксандра Лукашэнкі прайшоў рэферэндум, у выніку якога гэтыя дзяржаўныя сімвалы замянілі сцягам і гербам, створанымі на аснове сімволікі БССР.
