МЗС Польшчы пацвердзіў скарачэнне падтрымкі „Белсата” (абноўлена)
Міністр замежных спраў Польшчы Вітальд Вашчыкоўскі пацвердзіў намер скараціць фінансаванне „Белсата”.
У сваім Твітэры ён напісаў: „Польскі ўрад не з’яўляецца ўладальнікам „Белсата”. Мы абмяжоўваем фінансаванне канала па прычыне павелічэння консульскіх выдаткаў”.
Таксама ў інтэрв’ю каналу TVN24 палітык патлумачыў, што МЗС мае намер, у прыватнасці, адкрыць за мяжой новыя польскія консульствы і патроіць дапамогу сірыйскім уцекачам:
– Павінен, хоць і не хачу, абмежаваць фінансаванне гэтага тэлебачання з гледзішча на міжнародную сітуацыю і патрабаванні, якія выстаўляюцца польскай дыпламатыі. У нас павялічыліся, да прыкладу, консульскія, мы павінны ствараць новыя консульствы. Мы павінны стварыць ад новага года кол-цэнтр для палякаў, якія жывуць на Брытанскіх выспах, бо іх там два мільёны, разам з Ірландыяй. Мы павінны падвоіць ці патроіць нашу дапамогу сірыйскім уцекачам на Блізкім Усходзе, павінны пашырыць Карту паляка. Мы павінны пашырыць пытанне „польскай легітымацыі” дзяцей у школьнай адукацыі за мяжой. Усё гэта вымагае высілкаў і сродкаў. Мы абмяжоўваем фінансаванне, але не з’яўляемся ўладальнікамі „Белсата”. „Белсат” можа быць рэфармаваны, мае магчымасць пошуку іншых донараў у асяроддзі польскага ўраду ці прыватнага бізнеса.
Паводле наяўнай інфармацыі, Міністэрства замежных спраў мае намер зменшыць фінансаванне тэлеканала „Белсат” на дзве траціны: з 17 – да 5 мільёнаў злотых. Дырэктарка „Белсата” Агнешка Рамашэўская-Гузы лічыць, што гэта азначае яго фактычную ліквідацыю.
У той жа час польскі прэзідэнт Анджэй Дуда у інтэрвʼю выданню «Gazeta Polska Codziennie» пракаментаваў навіны пра абмежаванне дзейнасці тэлеканала Белсат.
Фота: Krzysztof Sitkowski / KPRP
Журналісты папрасілі прэзідэнта Польшчы пракаментаваць абвешчаныя ў СМІ планы польскага МЗС абмежаваць датацыі «Белсату» на 2/3. Кіраўніку Польшчы таксама працытавалі словы беларускай інтэлігенцыі і палітыкаў, якія вызначылі планы закрыцця «Белсату», як «трагедыю, якая дэмаралізуе».
„Гэта рашэнне міністра замежных спраў, які праводзіць сваю, аўтаномную, палітыку. І я не хачу ўмешвацца ў ягоныя кампетэнцыі. Для мяне важна, каб місія, якую дагэтуль рэалізоўваў «Белсат», працягвалася. Міністр замежных справаў запэўнівае мяне, што гэта адбудзецца праз большую актывізацыю ў гэтым пытанні «TVP Polonia». Таксама спадзяюся, што кіраўнік польскай дыпламатыі развее асцярогі асяродкаў, звязаных з «Белсатам», – заявіў Анджэй Дуда.
* * *
Асобы, якія гадамі займаюцца тэмай Усходняй Еўропы, звяртаюцца да міністра замежных справаў Польшчы Вітальда Вашчыкоўскага з просьбай не змяншаць фінансаванне тэлеканалу.
Змест ліста, які адначасова апублікавалі «wyborcza.pl», «wpolityce.pl», «obserwator międzynarodowy»:
Мы, хто падпісаліся ніжэй, даследчыкі, аналітыкі і журналісты, звязаныя з тэмай Усходняй Еўропы, звяртаемся з заклікам спыніць дзеянні, якія могуць стаць прычынай ліквідацыі «Белсату» ці абмежавання ягонай дзейнасці.
Як асобы, што ў сваёй працы займаюцца пытаннямі ўсходняй палітыкі, мы штодня бачым плён дзейнасці «Белсату». Акрамя таго, што гэта тэлеканал, гэта яшчэ і надзвычай важны цэнтр беларускай культуры, які між іншага развівае польска-беларускі дыялог.
Мы верым, што «Белсат» упісваецца ў польскую канцэпцыю ўсходняй палітыкі, якая ўваходзіць у нашыя нацыянальныя інтарэсы, а таксама прадугледжвае прасоўванне эканамічнай супрацы з Беларуссю. Гэтая супраца – адзін з прыярытэтаў цяперашняга ўраду.
Да таго ж мы хочам звярнуць увагу на той факт, што нават часовае зніжэнне фінансавага падтрымання для «Белсату» можа зрабіцца прычынай спынення некаторых праектаў, а таксама распаду каманды працаўнікоў. Гэта азначае страту рэсурсаў, на стварэнне якіх мы працавалі апошняе дзесяцігоддзе, і на аднаўленне якіх спатрэбяцца гады.
Мы разлічваем на падтрыманне нашага звароту і падтрыманне тэлеканалу «Белсат».
Ліст падпісалі:
- Моніка Андрушэўска – журналістка выдання «Tygodnik Powszechny», таварыства «Pokolenie»
- Каміль Басай – стваральнік і рэдактар «Disinfo_Digest»
- прафесар, доктар навук Роман Бэкер – палітолаг, юрыст, Універсітэт Мікалая Каперніка ў Торуні
- Анджэй Бжэзецкі – галоўны рэдактар часопісу «Nowa Europa Wschodnia»
- Томаш Гжывачэўскі – журналіст і пісьменнік, звязаны з выдавецтвамі «Wydawnictwo Czarne» i «Wydawnictwo Literackie»
- Войцех Якубік – галоўны рэдактар парталу «BiznesAlert.pl»
- Войцех Янкоўскі – журналіст выдання «Kurier Galicyjski», а таксама сустваральнік «Усходняй праграмы» на радыё «Wnet»
- Барташ Янік – палітолаг, Універсітэт Марыі Складоўскай-Кюры ў Любліне
- доктар Павэл Коваль – палітолаг, Польская Акадэмія навук
- доктар Томаш Ляхоўскі – юрыст, журналіст, галоўны рэдактар парталу «Obserwator Międzynarodowy», Лодскі ўніверсітэт
- доктар Адам Лелёнэк – эксперт Фонду Казімежа Пуласкага
- Пётр Мацёнжэк – галоўны рэдактар парталу «Energetyka24.com»
- Дар’юш Матэрняк – галоўны рэдактар польска-ўкраінскага парталу «PolUkr.net»
- Малгажата Ноцунь – намесніца галоўнага рэдактара часопісу «Nowa EuropaWschodnia»
- доктар Пётр Алексы– гісторык, Універсітэт Адама Міцкевіча ў Познані
- доктар Якуб Альхоўскі – палітолаг, Універсітэт Марыі Кюры-Складоўскай у Любліне
- доктар Януш Паўляк – гісторык
- Агнешка Пясэцка – эксперт фонду «Цэнтр даследаванняў Польшча – Украіна»
- Ярослаў Падворскі – гісторык, валанцёр
- Адам Райхарт – галоўны рэдактар выдання «New Eastern Europe»
- доктар Івона Райхарт – намесніца галоўнага рэдактара выдання «NewEastern Europe»
- доктар Магдалена Рэксць – палітолаг, Лодскі ўніверсітэт
- Вітальд Рэпэтовіч – журналіст, звязаны з парталам «Defence24»
- Марцін Рэй – рэдактар суполкі «Rosyjska V Kolumna w Polsce» («Расейская пятая калона ў Польшчы»)
- Мірослаў Равіцкі – выдавец і галоўны рэдактар выдання «Kurier Galicyjski»
- Марта Рыбіцка – фотарэпарцёрка ў «Forum Agencja Fotograficzna», а таксама ў «Horizon Agency»
- доктар Міхал Славікоўскі – палітолаг, Лодскі ўніверсітэт
- доктар Ольга Солаж – антраполаг, Дзяржаўная вышэйшая ўсходнееўрапейская школа ў Пшэмыслі
- доктар Марта Валяк – гісторык, палітолаг, Універсітэт Яна Каханоўскага ў Кельцах, філіял у Пётркуве-Трыбунальскім
- Януш Вдзенчак – эканаміст, рэдактар парталу «Obserwator Międzynarodowy», Лодскі ўніверсітэт
- Давід Вільдштайн – журналіст, кіраўнік публіцыстычнага аддзелу ў «TVPInfo»
Беларускае Радыё Рацыя
