У Беларусі ўвялі падатак на грыбы і ягады (абноўлена)
На новаўвядзенне ў сферы дадатковых пабораў з беларусаў звярнуў увагу Аляксандр Татарынцаў, у мінулым генеральны дырэктар ААТ «Джэм-банк».
«Яшчэ адзін удар па дармаедах.
А што вы думалі, заплацілі падатак на беднасць і вольныя? Можна грыбы-ягады збіраць ды пчол у вёсцы выгульваць? Не, не пройдзе. Цяпер за такія вольнасці таксама трэба плаціць падатак.
Мабыць, законная схема збору грыбоў (ягад, арэхаў і нават моху) цяпер будзе такой: купляеш талончык і ідзеш. А там кантралёру прад’явіце ў выпадку чаго. Няма квітка — браканьер, неплацельшчык, падлягаеце пакаранню па ўсёй строгасці. І не ўздумайце грыбамі адкупляцца — гэта крымінальны артыкул! Ну, ягады, напэўна, можна хутка з’есці, толькі не пры сведках.
І гэта не жарт, вось спасылка на афіцыйны дакумент. Набываем квіток, лета блізка!», — піша Аляксандр Татарынцаў на сваёй старонцы ў Facebook.
Назва дакумента абвяшчае:
«Аб устанаўленні таксавага кошту за пабочнае лесакарыстанне і нарыхтоўку другарадных лясных рэсурсаў, карыстанне ўчасткамі ляснога фонду ў культурна-аздараўленчых, турыстычных, іншых рэкрэацыйных і (або) спартыўна-масавых, фізкультурна-аздараўленчых, спартыўных, навукова-даследчых і адукацыйных мэтах».
Пастанова ўвайшла ў дзеянне з 31 снежня 2016 года.
Да «пабочнага лесакарыстання» адносяць касьбу, выпас жывёлы, размяшчэнне вулляў і пчальнікоў, нарыхтоўку драўняных сокаў, нарыхтоўку і збор дзікарослых пладоў, ягад, арэхаў, грыбоў і іншых харчовых лясных рэсурсаў, лекавай і тэхнічнай сыравіны, збор моху, ляснога подсцілу, апалага лісця.
Паводле пастановы, напрыклад, за 1 кілаграм грыбоў трэба заплаціць 0,01 базавай велічыні (0,23 руб).
Але, як патлумачылі «Нашай Ніве» ў Мінлясгасе, нічога страшнага не адбылося — гэтыя таксы былі заўсёды, і закранаюць яны толькі тых, хто збірае лясныя рэсурсы на продаж.
«Някіх новаўвядзенняў няма, — сказаў нам Ігар Малашэвіч, начальнік упраўлення Мінлясгаса. — Раней памер гэтых таксаў кожны аблвыканкам вызначаў самастойна. І цяжка было патлумачыць, чаму ў адным лесе такса такая, а ў суседнім, але ў іншай вобласці — іншая. Таму права вызначыць для ўсіх аднолькавыя таксы было аддадзена Саўміну».
Паводле Ігара Малашэвіча, апублікаваны дакумент можа быць цікавы толькі для ІП і тых бізнесоўцаў, якія робяць на лясных рэсурсах грошы, але яны і так заўсёды плацілі гэты падатак.
Астатніх жа беларусаў гэта не датычыць — для ўласнага карыстання грыбы і ягады можна збіраць бясплатна, як і раней, піша nn.by.
Фота: depositphotos.com
