Расея знайшла падставы для забароны ўсёй беларускай ялавічыны
Спецыялісты Рассельгаснагляда заявілі, што беларускі бок не забяспечвае патрэбнага ветэрынарнага кантролю. Ва ўвезенай у Расею ялавічыне пастаянна выяўляюцца небяспечныя мікраарганізмы, сцвярджаюць у ведамстве.
Калі ў Менску не прымуць экстраных мер для ўзмацнення кантролю над якасцю прадукцыі, якая пастаўляецца ў Расею, Рассельгаснагляд можа абмежаваць імпарт ялавічыны з усёй тэрыторыі Беларусі. Падставы для ўвядзення такіх абмежаванняў у расійскага ведамства ёсць, паведамілі ў аддзеле лабараторнага кантролю Рассельгаснагляда.
«Аналіз прадукцыі кажа пра тое, што ялавічына, якая накіроўваецца з Беларусі, не падвяргаецца дастатковаму ветэрынарнаму кантролю, у ёй пастаянна выяўляюцца лістэрыі», — растлумачыў прадстаўнік ведамства.
Прадстаўнік прэс-службы Рассельгаснагляда пацвердзіў РБК наяўнасць прэтэнзій да прадукцыі, якая пастаўляецца з Беларусі.
Па словах суразмоўцы РБК ў службе, у студзені 2017 года былі спынены спробы ўвозу больш за 40 партый малочнай і мясной прадукцыі беларускага паходжання, якая не адпавядае патрабаванням тэхнічных рэгламентаў і ветэрынарных правілаў ЕАЭС. Пры гэтым асноўныя парушэнні выяўлены ў прадпрыемстваў, размешчаных у Менскай, Віцебскай і Гомельскай абласцях. «Гэта сведчыць аб сістэмных недапрацоўках структурных падраздзяленняў абласных ветэрынарных службаў Рэспублікі Беларусь, а таксама аб практыцы адгрузак у Расею прадукцыі без ажыццяўлення фізічнага кантролю ветэрынарным доктарам», – удакладнілі ў Рассельгаснаглядзе.
nn.by
