Тысячы людзей выйшлі на маршы недармаедаў (абнаўляецца)
26 лютага ў чатырох гарадах Беларусі прайшлі акцыі супраць Дэкрэту №3.
На плошчы Леніна ў Бабруйску апоўдні сабралася ад 500 да 1000 чалавек. Удзельнікі акцыі супраць Дэкрэта №3 прынялі рэзалюцыю, сярод асноўных яе пунктаў — ультыматут рэспубліканскім і гарадскім уладам да 12 сакавіка адмяніць Дэкрэт №3 і ультыматум бабруйскім уладам адмяніць дзеянне гэтага дэкрэта для грамадзян горада. Прысутныя таксама выказаліся супраць размяшчэння расейскіх вайсковых базаў на тэрыторыі Беларусі і супраць распродажу беларускай маёмасці расейскім алігархам. Удзел у маршы ў Бабруйску ўзяў адзін з лідараў БХД Віталь Рымашэўскі – ураджэнец гэтага горада:
– Адзінагалосна прагаласавалі за гэтую рэзалюцыю. Сёння гучалі воклічы «Жыве Беларусь!» Людзі былі вельмі радыкальна настроеныя. У дачыненні да дзеючай улады воклічы «Лукашэнка сыходзь!» чуліся часцей ад простых грамадзян, чым ад выступоўцаў, якія арганізоўвалі сёння гэты мітынг. А сярод арганізатараў былі беларускія хрысціянскія дэмакраты. Самыя розныя людзі прыйшлі выказаць свой боль, незадаволенасць, сказаць, што яны не быдла, а грамадзяне сваёй краіны. І калі ёсць такія людзі ў нашага народа, то будзе жыць краіна. Абавязкова адменім Дэкрэт №3 і зменім гэтую ўладу.
Наступны мітынг у Бабруйску плануецца 12 сакавіка ў 12 гадзін.
У Віцебску марш працягваецца. У ім бярэ ўдзел каля 2000 чалавек – ацэньвае віцебская актывістка Таццяна Севярынец:
– Акцыя пачалася на плошчы Перамогі. І ўсе людзі, якія прыйшлі нібыта на Масленіцу, перайшлі на другі бок, дзе адбыўся імправізаваны мітынг. Кожны выказваўся не толькі пра Дэкрэт №3, але ўвогуле пра жыццё ў Беларусі. Людзі даведзены да адчаю, і гэта вельмі адчуваецца. Потым маршам, арганізаваным моладдзю, пад бел-чырвона-белымі сцягамі, мы пайшлі па цэнтральнай вуліцы Леніна. І зараз стаім каля філармоніі, дзе праходзіць другая частка мітынгу.
Таксама акцыі супраць дэкрэту пра дармаедаў сёння адбываліся ў Берасці і Баранавічах.
У Баранавічы адмыслова на пратэст прыехалі людзі з усяго рэгіёна. Кажа адзін з удзельнікаў акцыі:
– Мы самі з Бярозы, але паехалі ў Баранавічы, бо хочам падтрымаць беларускі народ. Стараемся ездзіць на ўсе акцыі. Паедзем і на акцыю ў Берасце. Бо мы не згодны з Дэкрэтам №3 і прыкладзём усе намаганні, каб гэты дэкрэт быў адменены. Я думаю, што людзей будзе штораз больш. Шмат маладых людзей. Людзі не абыякавы да гэтага дэкрэта. Трэба больш пра гэта гаварыць.
Арганізатары стварылі рэзалюцыю з заклікам не толькі адмяніць Дэкрэт №3, але таксама скасаваць кантрактную сістэму, знізіць пенсійны ўзрост, скасаваць дарожны збор і нават перайсці да парламецкай формы кіравання.
* * *
Акцыі фактычна не маюць арганізатараў, заяўкі на правядзенне мітынгаў у гарвыканкамы не падаваліся. Заклікі прыняць удзел у «маршах недармаедаў» у асноўным распаўсюджваюцца праз сацыяльныя сеткі.
Мітынг у Берасці скончыўся. Пратэстоўцы прынялі рашэнне сабрацца зноў праз тыдзень — 5 сакавіка.
«Маршы недармаедаў» у Баранавічах і Бабруйску таксама завершыліся.
Удзельнікі «маршу недармаедаў» зноў збіраюцца выйсці на мітынг у Бабруйску 12 сакавіка.
Акцыя ў Віцебску паступова завяршаецца, некаторыя пачынаюць разыходзіцца, іншыя яшчэ дыскутуюць. Людзі скандавалі «Жыве Беларусь», «Лукашэнка сыходзь», «Не – дэкрэту №3».
Наступная акцыя ў Віцебску запланавана на 25 сакавіка.
* * *
У Віцебску на плошчы Перамогі сабралася каля 2 тысяч чалавек. На гэтай жа плошчы пачынаецца арганізаванае ўладамі святкаванне Масленіцы. Таму, каб не перашкаджаць мерапрыемству, пратэстоўцы перайшлі на супрацьлеглы бок плошчы, дзе зараз адбываецца мітынг.
У Баранавічах таксама адбываецца мітынг. На месцы знаходзіцца наша карэспандэнтка:
– Сабралася больш за 300 чалавек. Людзі рознага ўзросту прыйшлі, выказваюцца актыўна, не баяцца гаварыць. Зараз выступае жанчына, якая прыехала з Бярозы. У яе ўлада забрала і дом, і зямлю. І вось яна з сям’ёй прыехала сюды падтрымаць акцыю, бо ў Бярозе пакуль нічога не адбываецца. Міліцыянты ўсё здымаюць, але нікому не замінаюць. Людзі настроены вельмі рашуча, яны вельмі злыя. Вядуць сход бацька і сын Чарнавусы. Яны зачыталі рэзалюцыю. Гаварылі не толькі пра Дэкрэт №3, але і пра дарожны падатак, пра тое, як усе гэтыя дэкрэты абмяжоўваюць свабоду беларусаў. Выказваліся за тое, каб была парламенцкая рэспубліка, каб сышоў Лукашэнка са сваёй пасады.
Як паведамляе „Свабода”, акцыя ў Бабруйску ўжо скончылася. Па падліках назіральнікаў было каля 1500 бабруйчан.
Да прысутных з прамовай звярнуўся сустаршыня БХД Віталь Рымашэўскі, які адмыслова прыехаў на акцыю з Менска. Удзельнікі мітынгу прынялі рэзалюцыю з патрабаваннем вызваліць жыхароў Бабруйску ад «падатку на дармаедаў», адмяніць Дэкрэт №3 па ўсё краіне і не размяшчаць расейскіх ваенных баз у Беларусі. Удзельнікі акцыі зноў збіраюцца выйсці на мітынг у Бабруйску 12 сакавіка.
Фота: twitter.com/viasna96
Акцыя праходзіць і ў Берасці, дзе таксама працуе наша карэспандэнтка:
– У Берасці на плошчы сабралася некалькі соцень чалавек. Гэта каля 300-400 грамадзян. У цэнтры як выступоўна ёсць Наталля Папкова, Аляксандр Кабанаў. Яны заклікаюць ўлады адмяніць Дэкрэт №3. Супраціву з боку праваахоўных органаў пакуль не назіраецца. Але вельмі шмат ёсць людзей у цывільным, якія здымаюць усё на відэакамеры.
Фота: twitter.com/viasna96
Фота: twitter.com/NatatnikOrg
Акцыі не маюць арганізатараў, заяўкі на іх правядзенне ў гарадскія выканкамы не падаваліся. Заклікі прыняць удзел у «маршах недармаедаў» пераважна пашыраюцца праз сацыяльныя сеткі.
Беларускае Радыё Рацыя
